‘बांधकामसाठी’च रस्सीखेच !

गडहिंग्लज नगरपालिका : सभापती निवडी; हसन मुश्रीफ यांचाच निर्णय अंतिम

राम मगदूम- गडहिंग्लज नगरपालिकेत विषय समित्यांच्या निवडीत बांधकाम सभापतीसाठीच रस्सीखेच आहे. पालिकेवर राष्ट्रवादीची सत्ता असून सभापती निवडीचे सर्वाधिकार आमदार हसन मुश्रीफ यांच्याकडेच आहेत. त्यामुळे त्यांच्याकडून निवडीच्या दिवशी (सोमवारी) बंद पाकिटातून नावे येतील व सभागृहात त्यावर शिक्कामोर्तब होईल.
पालिकेत सत्ताधारी राष्ट्रवादीचे ९, विरोधी जनता दलाचे ७ व जनसुराज्य शक्ती पक्षाचा १ नगरसेवक आहे. बहुमतामुळे सर्व समित्यांची सभापतिपदे राष्ट्रवादीकडेच आहेत. विरोधी आघाडीकडून निवडून आलेल्या भद्रापूर यांची साथ असल्यामुळे राष्ट्रवादीने त्यांना गतवर्षी बांधकाम सभापतिपद दिले आहे. मात्र, यावर्षी हे महत्त्वाचे पद राष्ट्रवादी पुन्हा आपल्याकडे घेण्याची शक्यता आहे.
विरोधी पक्षाला पालिकेत बैठकीसाठी स्वतंत्र कक्ष न मिळाल्याच्या आणि आपली कामे होत नसल्याच्या कारणातून गतवर्षी जनता दलाने सभापती निवडीवर बहिष्कार टाकला होता. यावेळी त्यांची भूमिकादेखील महत्त्वाची राहील. संख्याबळानुसार प्रत्येक समितीत राष्ट्रवादीला ३, तर जनता दलाला २ जागा मिळतात. जनता दल समिती निवडीत सहभागी झाल्यास भद्रापूर यांचे सभापतिपद अबाधित राहू शकते.
बांधकाम सभापतिपदासाठी किरण कदम व रामदास कुराडे यांनी फिल्डिंग लावली आहे. भद्रापूर यांच्यासह बरगेदेखील या पदासाठी इच्छुक आहेत. ‘महिला व बालकल्याण’साठी सुंदराबाई बिलावर, मंजूषा कदम व बरगे, तर ‘वाचनालय’साठी कदम व बरगे यांची नावे चर्चेत आहेत.

नगरसेवकांच्या कामगिरीची नोंद
लोकसभा आणि विधानसभा निवडणुकीत राष्ट्रवादीला गडहिंग्लज शहरात मिळालेल्या मतांची नोंद मुश्रीफांनी ठेवली आहे. सभापती निवडीत नगरसेवकांच्या निवडणुकीतील कामगिरीची दखल घेतली जाण्याची शक्यता आहे.


यापूर्वी यांना मिळाली संधी
पहिल्या अडीच वर्षांत मंजूषा कदम यांना नगराध्यक्षपदी, तर उपनगराध्यक्षपदी रामदास कुराडे व सुंदराबाई बिलावर यांना संधी मिळाली. दुसऱ्या टप्प्यात नगराध्यक्षपदी लक्ष्मी घुगरे यांना, तर उपनगराध्यक्षपदी कावेरी चौगुले यांना संधी मिळाली आहे.