कोंडीग्रेत दहावीच्या विद्यार्थ्याची आत्महत्या

जयसिंगपूर : अभ्यास कर असे सांगितल्याचा राग मनात धरुन दहावीच्या विद्यार्थ्याने कोंडीग्रे (ता. शिरोळ) येथे गळफास घेऊन आत्महत्या केल्याची घटना घडली. प्रज्वल संजय घाटगे (वय १६, रा. मंगलनगर कोंडीग्रे) असे विद्यार्थ्याचे नाव आहे. ही घटना सोमवारी रात्री पावणेनऊच्यासुमारास घडली असून, याबाबतची नोंद जयसिंगपूर पोलिसांत झाली आहे.

पोलिसांनी सांगितले की, प्रज्वल हा दहावी इयत्तेत शिकत होता. दहावीची परीक्षा जवळ आली आहे, तू अभ्यास कर, असे वडिलांनी सांगितले. याचा राग मनात धरुन त्याने घराच्या मागे असलेल्या खोलीतील छतास लोखंडी पाईपला साडीने गळफास घेऊन आत्महत्या केली. याबाबतची वर्दी वडील संजय शंकर घाटगे यांनी पोलिसांत दिली. शवविच्छेदन करून मृतदेह नातेवाईकांच्या ताब्यात देण्यात आला. अधिक तपास पोलीस नाईक चव्हाण करीत आहेत.