अशी ही सत्त्वपरीक्षा - भाग २

ऑफिसमध्ये गेल्याबरोबर काकांच्या पायाला हात लावून बोलला. सावंतांच्या घरातच लखोटा सापडला. काकांनी भरतला मिठी मारली. म्हणाले, परमेश्वराने तुझी सत्त्वपरीक्षा घेतली अन् तू पासही झालास. रविवारी सकाळी केशवकाका अन् भरत सावंतांच्या घरी गेले. सावंतांनी भरतचे तोंडभरून काैतुक केले अन् पैसे घरीच सापडल्याचे सांगितले. काका म्हणाले, भरतची बदनामी, मानसिक छळ अन् खोटा आळ करून पोलिसांचा धाक घालून आत्यंतिक छळ केल्याबद्दल मानहानीची भरपाई मागणी करणार आहोत. तुमचे पोलीस खात्यात मेहुणे जमादार आहेत तर माझे मेहुणे ख्यातनाम वकील काळदाते हे माहीत असतीलच, तर तुम्ही चांगल्यात चांगला वकील बघून काेर्टात केस लढण्यासाठी तयार राहा.

सावंत उठले अन् काकांचे पाय धरून म्हणाले. काका मी डोळस असून आंधळा होऊन भरतवर अन्याय केलेला आहे. तरी मला मोठ्या मनानी क्षमा करा.

पुढच्या रविवारी आमची जनरल मीटिंग आहे. काका बोलले. त्या मीटिंगमध्ये येऊन भरतला काय अन् कशी वागणूक देऊन त्याच्यावर आळ घेतला. तुमचे पैसे तुमच्याच घरी कसे मिळाले? हे सर्व वर्णन करून सर्वांच्यापुढे सांगायचे आहे. जर तुम्ही नाही आलात तर तयार केलेली क्लीप सभेत दाखवणार अन् केस दाखल होणार.

जनरल मीटिंगमध्ये सावंत चोरासारखे येऊन बसले. अन् काकांचा आदेश झाल्यानंतर सावंतांनी इत्थंभूत भरतबाबतची कहाणी कथन केली. भरतचे पाय धरून माफी मागितली. तशीच ही बातमी वर्तमानपत्रात गेली अन् सावंतांचा पूर्ण नक्षा उतरला.