‘विबग्योर’च्या विद्यार्थ्यांनी अनुभवले ‘युनो’तील कामकाज

मॉडेल युनायेटड नेशन्स् : ६० शाळांमधील ५०० जणांचा सहभाग; विविध प्रश्नांवर चर्चा

कोल्हापूर : विबग्योर मॉडेल युनायेटड नेशन्सच्या (व्हीएचएमयुएन) माध्यमातून संयुक्त राष्ट्रसंघातील (युनो) कामकाजाचा कोल्हापुरातील विबग्योर हायस्कूलच्या विद्यार्थ्यांनी अनुभव घेतला. त्यात त्यांनी विविध देशांचे प्रतिनिधित्व करत जगासमोरील दहशतवाद, अणुचाचणी, आदी प्रश्नांवर मते मांडली.
‘विबग्योर’तर्फे आयोजित सलग सहाव्या वर्षाचे व्हीएचएमयुएन मुंबईत दि. २३ ते २५ जूनदरम्यान घेण्यात आले. त्यात विविध ६० हायस्कूल व महाविद्यालयांतील पाचशे विद्यार्थी-विद्यार्थिनी सहभागी झाल्या होत्या. त्यात कोल्हापुरातील विबग्योर हायस्कूलमधील नववी व दहावीतील एकूण १९ विद्यार्थ्यांनी सहभाग घेतला. त्यात सात विद्यार्थिनी होत्या. या विद्यार्थी-विद्यार्थिनी संयुक्त राष्ट्रसंघातील सुरक्षा समिती, आपत्ती व्यवस्थापन, आर्थिक व सामाजिक, मानवी हक्क अशा समितींमध्ये सहभागी झाल्या. त्यांनी या समितींच्या माध्यमातून इराक, इराण, जर्मनी, श्रीलंका आदी देशांचे प्रतिनिधीत्व करत दहशतवाद, अणुचाचणी, जागतिक तापमानवाढ यासह विविध प्रश्नांवर मते मांडली शिवाय अन्य देशांचे प्रतिनिधीसमवेत चर्चा करून काही उपाय सुचविले. यासाठी त्यांना प्राचार्य टी. बालन व अन्य शिक्षकांचे मार्गदर्शन लाभले. दरम्यान, ‘व्हीएचएमयुएन’मधील सहभागाबाबत विबग्योर हायस्कूलमधील अद्वैत करमळकरने सांगितले की, या उपक्रमातील सहभागामुळे माझा आत्मविश्वास वाढला. आपली मते कोणत्याही वादाशिवाय इतरांना कशी पटवून द्यावयाची हे समजले. श्रेयस बिरादारने चांगला अनुभव, जगभरातील घडामोडी, विविध क्षेत्रांतील नवनवीन गोष्टी आणि संवाद कौशल्याचे महत्त्व समजल्याचे सांगितले. (प्रतिनिधी)

व्यक्तिमत्त्व विकासाला बळ
‘व्हीएचएमयुएन’ने विद्यार्थ्यांचा आत्मविश्वास वाढत आहे. त्यांच्यातील नेतृत्वगुण, संवाद व लेखनकौशल्यांद्वारे व्यक्तिमत्त्व विकासाला बळ देण्याचा प्रयत्न केला जात असल्याचे कोल्हापुरातील विबग्योर हायस्कूलचे प्राचार्य टी. बालन यांनी सांगितले.
ते म्हणाले, गेल्या चार वर्षांपासून कोल्हापूरचे विद्यार्थी सहभागी होत आहेत. वर्षागणिक त्यांची संख्या वाढत आहे.
त्यांचे सादरीकरण चांगले व्हावे यासाठी दोन महिने तयारी करून घेतली जाते. ‘व्हीएचएमयुएन’मध्ये विविध प्रश्नांवर मते मांडण्याची माहिती ते स्वत: संकलित करतात.
त्यामुळे त्यांच्या ज्ञानात भर पडते. व्हीएचएमयुएनप्रमाणेच व्हिवा, ग्रीन क्लब, आदी उपक्रम विद्यार्थ्यांसाठी राबविले जातात.