कडकडीत बंद अन तुरळक वाहतूक

कोल्हापूर : कडक लॉकडाऊनमधील शेवटचा रविवार. शहरातील सर्व भागात कडकडीत बंद, शांतात, सन्नाटा, प्रमुख रस्त्यावर तुरळक गर्दी, पोलीस बंदोबस्त असे दिवसभरातील चित्र राहिले. सोमवारपासून सकाळच्या टप्यात दुकाने सुरू होणार असल्याने स्वत:हून नागरिक घराबाहेर पडणे टाळल्याचे दिसले.

रविवारी सुटीचा दिवस असल्याने इतरवेळी कोल्हापुरात पर्यटकांची गर्दी असते; पण कडक लॉकडाऊनचा रविवार असल्याने शहरातील अनेक रस्ते ओस पडले होते. प्रमुख रस्त्यावर अत्यावश्यक सेवेसाठीची आणि आरोग्य कारणासाठी बाहेर पडलेल्यांचीच वाहने राहिली. ताराबाई रोड, लक्ष्मीपुरी, राजारामपुरी, गांधीनगर येथील मार्केटमध्ये शुकशुकाट राहिला. रंकाळा आणि मध्यवर्ती बसस्थानकात पार्किंग केलेले बसच दिसत होते. अधिकारी, कर्मचाऱ्यांची वर्दळही नव्हती. हा परिसर निर्मनुष्य दिसत होता; पण महापालिकेतर्फे शहरात सुरू केलेल्या कोविड काळजी केंद्रासमोर आणि कोरोना रुग्णावर उपचार करण्यात येणाऱ्या शहरातील सर्व हॉस्पिटल, औषध दुकानांत नातेवाइकांची वर्दळ अधिक दिसत होती. तेथील अनेक नातेवाइकांच्या चेहऱ्यावर चिंता गडद दिसत होती.

ताराराणी चौक ते टेंबलाई नाका आणि राष्ट्रीय महामार्गावर वाहनांची संख्या कमी होती. सीपीआर, लक्ष्मीपुरी, राजारामपुरी आदी हॉस्पिटल असलेल्या ठिकाणी दिवसभर रुग्णवाहिका धावत राहिल्या. त्यांच्या सायरनच्या आवाजाने चिंतेत भरच पडत होती. शिवाजीपेठ, मंगळवारपेठ, कसबा बावडा अशा निवासी ठिकाणी काही तरुण कट्ट्यावर बसून दिवसभर चर्चेचा फड रंगवला.

चौकट

शेवटचाच लॉकडाऊन ठरावा

शहरावर यापुढे कधीही कडक लॉकडाऊनची वेळ येऊ नये, आठ दिवसांचा लॉकडाऊन शेवटचाच ठरावा, अशा प्रतिक्रिया रविवारी दिवसभर शहरातील सामान्यांमध्येही होत्या. लॉकडाऊनची अंमलबजावणी करण्यासाठी रस्त्यावर सेवेत असणारे पोलीस काही प्रमाणात निवांत दिसत होते. बहुतांशी दुकानदार, व्यापारी आज, सोमवारपासून दुकाने सुरू करण्याची तयारी करीत होते.

चौकट

महाद्वार रोड सुनासुना

महाद्वार रोड, अंबाबाई मंदिर परिसरात प्रत्येक रविवारी मोठी गर्दी असते. पर्यटकांनी हा परिसर फुलून गेलेला असतो; पण दिवसभर या परिसरात नीरव शांतता राहिली. केवळ बंदोबस्तातील पोलिसांची तुरळक गर्दी दिसली. बिंदू चौकातील पार्किंगचे ठिकाण पूर्णपणे रिकामे होते.

फोटो ओळी

कडक लॉकडाऊनमुळे रविवार असूनही ताराराणी रोड ते टेंबलाई नाका येथील प्रमुख रस्ता असा सुनासुना होता. फोटो : नसीर अत्तार

फोटो : २३०५२०२१ कोल ताराराणी चौक

कडक लॉकडाऊनमुळे रंकाळा बसस्थानक परिसरात असा सन्नाटा होता.

फोटो : नसीर अत्तार

फोटो : २३०५२०२१ कोल रंकाळा फोटो : नसीर अत्तार