दत्तवाडमध्ये भटक्या कुत्र्यांचा धुमाकूळ सुरूच

दत्तवाड : दत्तवाड (ता. शिरोळ) येथे बुधवारी सायंकाळी कुत्रे पकडणाऱ्या पथकावर कुत्र्यांनी हल्ला करून एकाला जखमी केल्यानंतर गुरुवारी (दि. १८) ही मोहीम थांबविण्यात आली. तर बुधवारी रात्री टाकळीवाडी येथे म्हशीच्या रेडकूवर तर नवे दानवाड येथे एका गायीवर कुत्र्यांनी हल्ला केला. त्यामुळे शेतकऱ्यांमध्ये भीतीचे वातावरण पसरले आहे. तथापि शुक्रवारपासून सलग तीन दिवस कुत्रे पकडण्याची मोहीम सुरू करणार असल्याची माहिती प्रशासनामार्फत देण्यात आली. दत्तवाडसह परिसरात भटक्या कुत्र्यांनी धुमाकूळ घातला असून जनावरांवर हल्ले सुरूच आहेत. गुरुवारी सकाळी शेताकडे जाणाऱ्या झुणके या महिलेवर कुत्र्यांनी हल्ला करण्याचा प्रयत्न केला. यावेळी ग्रामस्थांनी कुत्र्यांना पिटाळून लावल्याने अनर्थ टळला.

दरम्यान, ग्रामपंचायत सदस्य नूर काले यांनी गुरुवारी तहसीलदार अपर्णा मोरे यांना भटकी कुत्रे पकडण्याची मोहीम सुरु करण्याची मागणी केली. याप्रकरणी कारवाई न झाल्यास उपोषणाचा इशारा यावेळी देण्यात आला. यावेळी लाला मांजरेकर, अमोल कोळी, बसगोंडा पाटील, सुरज बेनाडे यांच्यासह उपस्थित होते.

फोटो - १८०२२०२१-जेएवाय-१०

फोटो ओळ - शिरोळ येथे मागण्यांचे निवेदन तहसीलदार डॉ. अपर्णा मोरे यांना ग्रामस्थांच्यावतीने देण्यात आले.