शालिनी सिनेटोनची जागा हेरिटेज ग्रेड तीनमध्ये समावेश करण्यास राज्य शासनाचा नकार

कोल्हापूर : मराठी चित्रपट सृष्टीचा मानदंड असलेल्या शालिनी सिनेटोनच्या मोकळ्या जागेचा हेरिटेज ग्रेट ३ मध्ये समावेश करण्यास राज्य शासनाने नकार दिला असून, याबाबतचा महापालिकेचा प्रस्ताव फेटाळण्यात आला आहे. महापालिका सभागृहात झालेला ठराव, शहरस्तरीय हेरिटेज कमिटीने घेतलेला निर्णय विरोधात असूनही ठेकेदाराला जागा मिळेल, असा निर्णय राज्य शासनाने घेतल्याबद्दल चित्रपट क्षेत्रात तीव्र नाराजी व्यक्त झाली.

एकेकाळी मराठी चित्रपट निर्मितीचे प्रमुख केंद्र बनलेला शालिनी सिनेटोन छत्रपती शाहू महाराज यांच्या कन्या आक्कासाहेब महाराज यांनी स्थापन केला. त्याकरिता ४७ एकर जागा उपलब्ध करून दिली होती. कालांतराने हा स्टुडिओ दिग्दर्शक व्ही. शांताराम यांनी काही काळ चालविला. त्यानंतर तो मूळ मालक असलेल्या देवासच्या महाराजांकडे गेला. मराठी चित्रपटाचा पडता काळ सुरू झाला आणि शहराचे नागरीकरण वाढत जाईल तसे या स्टुडिओच्या जागेवर विकसनाचा विचार पुढे आला.

देवास महाराजांचे वटमुखत्यार घेतलेल्या ठेकेदार चांगदेव घुमेर यांनी महापालिकेकडे रीतसर अर्ज करून विकसन परवानगी मागितली होती. परंतु शालिनी सिनेटोनची इमारत असलेले दोन भूखंड स्टुडिओसाठी आरक्षित ठेवण्याच्या अटीवर बाकीच्या जागेवरील रेखांकनास मंजुरी देण्यात आली. तसेच प्रतिज्ञापत्रही घुमरे यांनी दिले होते. त्यामुळे स्टुडिओची जागा आरक्षित राहिली असे वाटत असतानाच पुन्हा गेल्या पाच-सहा वर्षांत घुमरे यांनी स्टुडिओची जागेवरील रेखांकनास परवानगी देण्याची विनंती राज्य सरकारकडे केली होती.

या जागेवर स्टुडिओचे आरक्षण ठेवण्याचा ठराव महापालिका सभेत झाला होता. शहरस्तरीय हेरिटेज कमिटीने ही जागा हेरिटेज ग्रेड ३ मध्ये समाविष्ट करण्याचा निर्णय घेतला होता. तरीही राज्य शासनाने या जागेचा समावेश हेरिटेज ग्रेड ३ मध्ये समावेश करण्यास नकार देऊन विकसकांचे रेखांकन मंजूर करण्याच्या सूचना दिल्या आहेत. त्यामुळे स्टुडिओची उरली-सुरली जागाही आता जाणार असल्याचे स्पष्ट झाले.

कोल्हापूरकर गप्प का?

पालकमंत्री सतेज पाटील, ग्रामविकासमंत्री हसन मुश्रीफ, आमदार ऋतुराज पाटील, आमदार चंद्रकांत जाधव, खासदार संजय मंडलिक मंडळी असूनही आम्हा चित्रपट व्यावसायिकांना कोणी वाली नाही. मी खूप प्रयत्न केला; पण चित्रपट महामंडळ काहीच करत नाही. या ऐतिहासिक वास्तू जतन करण्यासाठी इच्छाशक्ती कोणाकडेच नाही. शाहू महाराजांच्या कर्तृत्वाचा सगळ्या देशात आदर करतात, त्यांच्याच कोल्हापुरात हा ऐतिहासिक ठेवा नष्ट करताना कोल्हापूरकर का गप्प आहेत?

-सुरेखा शहा, अभिनेत्री

कोट -

राज्य शासनाने घेतलेल्या निर्णयाची माहिती कळविली आहे. परंतु स्टुडिओच्या जागेचा वाद न्यायालयात प्रलंबित असल्याने सध्यातरी निकाल लागेपर्यंत विकासकाला रेखांकनाला परवानगी देण्याचा प्रश्नच येत नाही.

-आर. सी. महाजन, सहायक संचालक, नगररचना