एसटीचे प्रवासी पळविणारे हॉटलिस्टवर

परिवहन महामंडळाची मोहीम : बसस्थानक परिसरात ४० दिवसांत अवैध वाहतूक करणाऱ्या २१ हजार नोंदी

प्रदीप शिंदे-कोल्हापूर -जिल्ह्यात राज्य परिवहन महामंडळाच्या बसेसना स्थानकाच्या परिसरातून होणाऱ्या अवैध खासगी प्रवासी वाहतुकीचा मोठा फटका बसत आहे. यावर कारवाई करण्यासाठी एस.टी. महामंडळ, प्रादेशिक परिवहन कार्यालय व स्थानिक पोलीस प्रशासनाच्यावतीने उघडलेल्या मोहिमेंतर्गत गेल्या ४० दिवसांत जिल्ह्यातील १२ बसस्थानकांतील २०० मीटरच्या आत नो पार्किंग झोनमधून खासगी प्रवासी अवैध वाहतूक करणाऱ्या २१,५७६ वाहनांच्या नोंदी करण्यात आल्या आहेत.राज्य परिवहन महामंडळाच्या बसस्थानकांच्या २०० मीटर परिसरात विनापरवाना प्रवासी वाहतूक करण्यास निर्बंध आहेत. तरीही अनेक खासगी बसेस, जीप, मेटॅडोअर, टुरिस्ट वाहने बिनदिक्कत प्रवासी वाहतूक करीत आहेत. त्यामुळे सामाजिक बांधीलकी जपत प्रवाशांच्या सेवेसाठी प्रसंगी तोटा सहन करून केवळ बोटांवर मोजता येतील इतक्या प्रवाशांना घेऊन वाहतूक करणाऱ्या एस.टी.चे कंबरडे मोडले आहे. याला अटकाव करण्यासाठी तसेच नियमांची अंमलबजावणी करण्यासाठी एस.टी. महामंडळ, प्रादेशिक परिवहन कार्यालय व संबंधित स्थानकांतील स्थानिक पोलीस प्रशासन यांच्यावतीने कडक पावले उचलण्यात आली आहेत. त्यानुसार महामंडळाच्यावतीने दिवसात तीन टप्प्यांत २०० मीटरच्या आत अवैध वाहतूक करणाऱ्या वाहनांची नोंद केली जात आहे. यावेळी संबंधित वाहनाचा प्रकार, नंबर यांची सविस्तर माहिती घेतली जात असून, महामंडळाच्यावतीने माहितीची एक प्रत परिवहन विभाग, शहर वाहतूक शाखा, स्थानिक पोलीस ठाण्यांसह राज्य परिवहनच्या मुंबई कार्यालयास पाठविली जात आहे. ६ नोव्हेंबरला या मोहिमेची सुरुवात झाली असून, १६ डिसेंबरपर्यंत ४० दिवसांत राज्य परिवहन महामंडळाच्या कोल्हापूर विभागातील १२ आगारांतील २०० मीटर नो पार्किंग झोनमधून २१,५७६ खासगी वाहनांनी अवैध वाहतूक केली आहे. प्रशासनाच्यावतीने ही वाहतूक रोखून संबंधितांवर कडक कारवाई केल्यास महामंडळाच्या उत्पन्नात नक्कीच वाढ होणार आहे.


राधानगरी सुपर फास्ट...
१२ आगारांतील ४० दिवसांच्या तपासणीमध्ये राधानगरी आगारात सर्वांत जास्त अवैध प्रवासी वाहतूक झाल्याचे निदर्शनास आले आहे. येथे ३,८४४ अवैध वाहनांतून प्रवासी वाहतूक झाली. यामध्ये २,८३१ जीपमधून वाहतूक झाली आहे. त्यापाठोपाठ कागल आगाराचा क्रमांक येतो. कागलमधून ३,३४८ वाहनांनी अवैध प्रवासी वाहतूक केली आहे. येथून २,३९५ रिक्षांमधून वाहतूक झाली आहे.


अशी आहेत १२ आगारांतील वाहने
जीप१०,५९६
मेटॅडोअर१००
रिक्षा७,५८६
टुरिस्ट वाहने७०५
इतर वाहने२,५८९
एकूण२१५७६


या आगारांत केली तपासणी...
कोल्हापूर मध्यवर्ती बसस्थानक परिसर, संभाजीनगर, इचलकरंजी, गडहिंग्लज, गारगोटी, मलकापूर, चंदगड, कुरुंदवाड, कागल, राधानगरी, गगनबावडा, आजरा.