परवानगी घेऊनच सोमय्या पुन्हा कोल्हापुरात

कोल्हापूर : जिल्हा प्रशासनाची रीतसर परवानगी घेऊनच भाजप नेते किरीट सोमय्या पुन्हा कोल्हापूरच्या दौऱ्यावर येण्याची शक्यता आहे. केंद्रीय मंत्री नितीन गडकरी हे शनिवारी कराडच्या दौऱ्यावर आहेत. त्यानंतर पुन्हा या हालचाली सुरू होतील असे सांगण्यात येते.

सोमय्या यांनी १३ सप्टेंबर २०२१ रोजी ग्रामविकासमंत्री हसन मुश्रीफ यांच्यावर १२७ कोटींच्या घोटाळ्याचा पहिला आरोप केला. हा पैसा सरसेनापती संताजी घोरपडे साखर कारखान्याकडे वळविल्याचा त्यांचा आरोप होता. त्यानंतर त्यांनी २० सप्टेंबरला कोल्हापूर जिल्हा दौऱ्याची घोषणा केली. घोरपडे कारखान्याची पाहणी आणि मुरगुड पोलूस स्टेशन, तसेच कोल्हापूर जिल्हा पोलीस अधीक्षकांची भेट व अन्य त्यांचे कार्यक्रम होते; परंतु त्यांना कोल्हापुरात येण्यापासून जिल्हा प्रशासन आणि पोलिसांनी रोखले आणि महालक्ष्मी एक्स्प्रेसमधून कराडमध्येच उतरविले.

आता पुन्हा सोमय्या कोल्हापूरला येणार आहेत; परंतु त्याआधी ते रीतसर जिल्हा प्रशासन आणि पोलीस प्रशासनाची परवानगी घेऊन येण्याच्या नियोजनात आहेत. एकतर ज्या पद्धतीने सोमय्या यांना विरोध झाला त्यातून सोमय्यांनाच अधिक प्रसिद्धी मिळाली असा सूर व्यक्त होत आहे. जर सोमय्या यांना विरोधच केला नसता तर ते येऊन कोल्हापुरात पत्रकार परिषद घेऊन गेले असते. तशीच पत्रकार परिषद हसन मुश्रीफ समर्थकही घेऊ शकले असते; परंतु हातात ‘पायताण’ घेऊन विरोध केल्याने आणि मुंबईपासून सोमय्या यांना रोखण्यासाठी जी यंत्रणा लावण्यात आली त्याचे लाइव्ह चित्रण दाखविले गेल्याने प्रमाणापेक्षा सोमय्या यांच्यावर फोकस राहिला. जो त्यांना अपेक्षित होता.