कुरुंदवाड येथे मुख्याधिकारी दालनासमोर ठिय्या आंदोलन

शहरातील लाॅकडाऊनबाबत मुख्याधिकारी निखिल जाधव दंडात्मक कारवाई करताना पक्षपाती करत असल्याच्या निषेधार्थ माजी नगरसेवक दीपक पोमाजे व शिवसेना माजी शहरप्रमुख राजू आवळे यांनी मुख्याधिकारी दालनासमोर ठिय्या आंदोलन केले. त्यामुळे वातावरण तणावपूर्ण झाले होते. अखेर शहर काँग्रेस अध्यक्ष विजय पाटील व पोलीस उपनिरीक्षक अमित पाटील यांनी शिष्टाई करत वाद मिटविल्याने तणाव निवळला.

कोरोनाच्या पार्श्वभूमीवर शहरात कडक लाॅकडाऊन आहे. शुक्रवारी दुपारी काही मुले क्रिकेट खेळून परतत असताना मास्क वापरले नसल्याच्या कारणावरून मुख्याधिकारी जाधव यांनी मुलांना पोलीस ठाण्यात नेऊन प्रत्येकी पाचशे रुपयांची दंडात्मक कारवाई केली, तर दुसरीकडे उपनगराध्यक्ष निवडीवेळी समर्थकांनी जल्लोषी मिरवणूक काढली असताना मुख्याधिकारी जाधव यांनी केवळ दहाजणांवर शंभर रुपयेप्रमाणे दंडात्मक कारवाई केली.

लाॅकडाऊन नियम भंगाबाबत दंडात्मक कारवाईत लोकप्रतिनिधींना एक, तर सर्वसामान्यांना वेगळा नियम लावून कारवाईत पक्षपाती केल्याच्या निषेधार्थ पोमाजे व आवळे हे मुख्याधिकारी जाधव यांना जाब विचारण्यासाठी मुख्याधिकारी कक्षाजवळ गेले. मात्र, मुख्याधिकारी जाधव यांनी दालनात प्रवेशास परवानगी न दिल्याने दालनासमोरच ठिय्या आंदोलन केले.

वाद चिघळण्याची शक्यता असल्याने पोलिसांना पाचारण करण्यात आले. आंदोलन आपल्या मतावर, तर मुख्याधिकारी भेट न देण्यावर ठाम असल्याने वातावरण तणावपूर्ण बनले होते.

यावेळी काँग्रेस गटनेते पाटील यांनी मुख्याधिकारी जाधव यांची, तर पोलीस उपनिरीक्षक पाटील यांनी आंदोलकांची समजूत काढत आंदोलन मिटविल्याने तणाव निवळला. मात्र, कारवाईबाबत मुख्याधिकारी यांची पक्षपाती आणि हटवादी भूमिका शहरात चांगलीच रंगली आहे.

फोटो - कुरुंदवाड येथे मुख्याधिकारी निखिल जाधव यांच्या विरोधात मुख्याधिकारी कक्षासमोर ठिय्या आंदोलन करणाऱ्यांची पोलीस उपनिरीक्षक अमित पाटील यांनी समजूत काढली.