आजरा तालुक्यातील २६ गावांमधून शिवजयंती साजरी

लोकमत न्यूज नेटवर्क

आजरा : आजरा तालुक्यात महिलांच्या लेझीम स्पर्धा, रक्तदान शिबिर, प्रतिमापूजन व विविध गडांवरून शिवज्योत आणून शिवजयंती साजरी करण्यात आली. मराठा महासंघाच्यावतीने आजऱ्यात झालेल्या लेझीम स्पर्धेत कोवाडे येथील सातेरी कन्या लेझीम पथकाने प्रथम क्रमांक मिळवला. तालुक्यातील २६ गावांमधून शिवजयंती साजरी करण्यात आली. शुक्रवारी सकाळपासूनच गावागावात शिवाजी महाराजांचा इतिहास सांगणारे पोवाडे लावण्यात आले होते. शिवजयंती उत्सव कोरोनाचा प्रादुर्भाव वाढत असल्याने साजरा करण्यास पोलिसांनी परवानगी नाकारली होती. तरीही अनेक गावांमध्ये पारगड, रांगणा, प्रतापराव गुर्जर स्मारक, पन्हाळा येथून शिवज्योत आणून मिरवणूक काढण्यात आली. आजरा महाविद्यालयात प्र. प्राचार्य डॉ. अशोक सादळे, गंगामाई वाचनालयात अध्यक्ष डॉ. अशोक बाचूळकर, आजरा पंचायत समितीमध्ये सभापती उदयराज पवार यांच्या हस्ते शिवाजी महाराजांच्या प्रतिमेचे पूजन करण्यात आले. आजरा तालुका मराठा महासंघाच्यावतीने महिलांच्या लेझीम स्पर्धा घेण्यात आल्या. शिवाजी महाराजांच्या पुतळ्याला तालुकाध्यक्ष बंडोपंत चव्हाण, महिला आघाडीप्रमुख रचना होलम, नगराध्यक्ष ज्योत्स्ना चराटी यांनी पुष्पहार घातला. यानंतर लेझीम स्पर्धा घेण्यात आल्या. या स्पर्धेत सात संघांनी भाग घेतला होता. बक्षीस वितरण मराठा महासंघाचे जिल्हाध्यक्ष मारूती मोरे यांच्यासह मान्यवरांच्या हस्ते करण्यात आले. ---------------------------

*

महिलांच्या लेझीम स्पर्धा

लेझीम स्पर्धेत प्रथम सातेरी कन्या लेझीम पथक, कोवाडे, द्वितीय भावेश्वरी, हाजगोळी खुर्द, तृतीय आवंडी महिला, आवंडी वसाहत तर उत्कृष्ट हलगीवादक म्हणून कोवाडे संघाचे जोतिबा जगदाळे यांना रोख रक्कम व स्मृतिचिन्ह देऊन गौरविण्यात आले. ---------------------------

* रक्तदान शिबिरातून शिवजयंती

तालुक्यातील चार गावांमध्ये रक्तदान शिबिर तर तीन गावांमध्ये पुतळा पूजन तर २२ गावांमध्ये प्रतिमापूजन करून शिवजयंती साजरी करण्यात आली. यानिमित्त आयोजित रक्तदान शिबिरात साळगाव, लाटगाव, उत्तूर, कोवाडे येथील तरूणांनी भाग घेतला.

.

---------------------------

* फोटो ओळी : आजऱ्यातील श्रीमंत गंगामाई वाचन मंदिरात शिवाजी महाराज जयंतीनिमित्त प्रतिमापूजन करण्यात आले.

दुसऱ्या छायाचित्रात मराठा महासंघाच्यावतीने आयोजित महिलांच्या लेझीम स्पर्धेतील एक क्षण.

क्रमांक : १९०२२०२१-गड-०८/०९