लोकमत न्यूज नेटवर्क
कोल्हापूर : महाराष्ट्र लोकसेवा आयोगाच्या कक्षेबाहेरील गट ब आणि गट क मधील रिक्त पदांच्या सरळसेवा पदभरती प्रक्रियेसाठी पूर्वीच्या सरकारने आणलेल्या ‘महापोर्टल’ प्रणालीमध्ये अनेक त्रुटी असल्याने विद्यार्थ्यांच्या तक्रारी होत्या. यामुळे महाविकास आघाडी सरकारने तात्काळ या प्रणालीला स्थगिती देत सरळसेवा भरतीसाठी चार कंपन्यांची निवड केल्याची माहिती पालकमंत्री सतेज पाटील यांनी दिली.
मेसर्स ॲपटेक लिमिटेड, मेसर्स जीए सॉफ्टवेअर टेक्नॉलॉजी, मेसर्स जिंजर वेब्ज, मेसर्स मेटा-आय टेक्नॉलॉजी या चार कंपन्यांना राज्यातील आगामी पाच वर्षांतील मंत्रालयीन प्रशासकीय विभाग, त्याच्या आधिपत्याखालील शासकीय विभाग, एमएपीएसीच्या कार्यकक्षेबाहेरील गट ‘ब’ व गट ‘क’च्या परीक्षा पद्धती राबवण्यासाठी परवानगी देण्यात आली आहे.
दिवस-रात्र मेहनत करणाऱ्या आपल्या विद्यार्थी-विद्यार्थिनींना सक्षम व पारदर्शक पदभरती प्रणाली उपलब्ध करण्यासाठी महाविकास आघाडी प्रयत्नशील आहे; परंतु अचानक आलेल्या या कोरोनाच्या संकटामुळे या कामाला काही प्रमाणात वेळ लागत होता. पदभरतीसाठी सक्षम व पारदर्शक प्रणाली उभी करण्यासाठी राज्य सरकारकडून काढण्यात आलेली टेंडर प्रक्रिया ११ डिसेंबर २०२० राेजी पूर्ण झाली असून, त्या संबंधित शासन निर्णय २२ जानेवारी २०२१ रोजी प्रसिद्ध करण्यात आल्याचे पालकमंत्री सतेज पाटील यांनी सांगितले.