निर्जन स्थळ बनले गुन्हेगारांचे अड्डे!

कोल्हापूर : शहर व उपनगरांत अनेक निर्जन स्थळे गुन्हेगारांचे अड्डे बनल्याचे चित्र दिसून येत आहे. निर्भया बलात्कार प्रकरणानंतर अशा निर्जन स्थळांचा शोध घेऊन त्यावर लक्ष ठेवण्याचे आदेश पोलिसांना दिले. कोल्हापूर शहर व परिसरात सुमारे ६१ निर्जन स्थळे निश्चित करून पोलिसांनी करडी नजर ठेवली. जिल्ह्यातील निर्जन स्थळावर लक्ष ठेवण्यासाठी ६ निर्भया पथके नेमली. पोलीस ठाण्याचा दैनंदिन कार्यभार सांभाळत निर्जन स्थळावर गस्त घालताना निर्भया पथकाला कमालीची कसरत करावी लागते. त्यामुळे अशा स्थळांकडे त्यांची फिरती मंदावल्याचे दिसते.

महिलांच्या सुरक्षेच्या दृष्टीने गर्दीच्या ठिकाणी तसेच निर्जन स्थळावरील गुन्हेगारी कारवाई कमी व्हाव्यात, या उद्देशाने निर्भया पथके सक्रिय आहे. कोरोना महामारीत निर्भया पथकांच्या कामाला काहीसा ब्रेक लागला. आता ही पथके पुन्हा सक्रिय झाली. जिल्ह्यात कोल्हापूर, करवीर, इचलकरंजी, जयसिंगपूर, शाहुवाडी, गडहिंग्लज अशी पोलीस उपविभागीय कार्यालयानुसार सहा पथके सक्रिय आहेत.

जिल्ह्यात महिला अत्याचाराच्या घटना

वर्ष : बलात्कार - विनयभंग

२०१९ : १२८ - २३७

२०२० : ११५ - ३१८

२०२१ (ऑगस्ट) : ८२ - १७१

निर्भय पथकाची कारवाई

वर्ष : गुन्हे दाखल - समुपदेशन - प्रतिबंधात्मक करवाई - वाहनांवर कारवाई

२०१९ : ०९ - २४,१४१ - १५,६६८ - ६,८४६

२०२० : ०६ - २,८८२ - १,३५१ - ५०७

२०२१ : ०४ - ९२८ - ६७६ - ३८२

शहरात ६१ निर्जन स्थळांची यादी

कोल्हापूर शहरात सर्व उद्याने, मंदिरे तसेच चित्रनगरी, रंकाळा पदपथ, शिवाजी विद्यापीठ परिसर, पुईखडी, चंबुखडी, शिये टोल नाका परिसर, आयसोलेशन परिसर आदी सुमारे ६१ निर्जन स्थळे पोलीसांनी निश्चीत करुन त्यावर लक्ष केंद्रित केले.

ही ठिकाणे धोक्याचीच!

चित्रनगरी : निर्जन, महामार्गानजीक व शहरापासून दूरवर हा परिसर असल्याने येथे गुन्हेगारांचा नेहमीच वावर दिसतो. विशेषत: हा भाग कमी लोकवस्तीचा असल्याने दिवसाही निर्जन असल्याने ते प्रेमी युगुलांचे आश्रयस्थान मानले जाते. याचाच हे गुन्हेगार गैरफायदा उठवून गैरकृत्ये करतात.

आयसोलेशन परिसर : आयसोलेशन हॉस्पिटलच्या पिछाडीस रिंगरोड तसेच गर्द झाडी आहे. लोकवस्ती विरळ असल्याने हा गैरकृत्याचा अड्डाच बनला आहे. रात्रीच्या वेळी हा परिसर अंधारमय व शहरालगतच असल्याने येथे मोठ्या प्रमणावर गैरकृत्ये घडतात.

पुईखडी टेकडी : राधानगरीकडे जाणारा हा अंधारमय मार्ग व टेकडीचा परिसर असल्याने लोकवस्ती अद्याप विरळच आहे. त्यामुळे या परिसरात प्रेमीयुगुलांना लुटण्याचे प्रकार घडत आहेत.

पोलीस चुकूनच दिसतात...

शहर व परिसरातील निर्जन स्थळे निश्चित आहेत. एका पथकात एक महिला उपनिरीक्षक, दोन महिला व दोन पुरुष पोलीस अशी पाच जणांची पथकांची संख्या आहे, प्रत्येक पथकास एक चारचाकी वाहन दिले. कोरोनामुळे या पथकाची गस्त निर्जन स्थळावर कमी झाली आहे. त्यामुळे पोलीस चुकूनच त्या स्थळावर गस्त घालताना दिसतात.