स्काऊट गाईड ही जगण्याची चळवळ

लोकमत न्यूज नेटवर्क

गडहिंग्लज : स्काऊट गाईडचे नियम व ध्येय हे केवळ पाठांतरासाठी नाही तर ते आचरणात आणण्याची गरज आहे. शिबिरात मिळणारे ज्ञान हे जगण्याचे बळ देते. त्यामुळे स्काऊट गाईड ही जगण्याची चळवळ आहे, असे मत कोल्हापूर जिल्ह्याचे माध्यमिक शिक्षणाधिकारी किरण लोहार यांनी व्यक्त केले.

सोनतळी (जि. कोल्हापूर) येथे आयोजित स्काऊट गाईड राज्य पुरस्कार शिबिराच्या सांगता समारंभात ते बोलत होते. यावेळी अध्यक्षस्थानी राज्य प्रशिक्षण आयुक्त किशोरी शिरकर होत्या.

लोहार म्हणाले, निसर्गाच्या सानिध्यात जीवन समृद्ध होते. ध्येय निश्चित करा व त्यादृष्टीने वाटचाल करा. लिहिण्यात चूक होऊ दे पण आचरणात चूक होऊ देऊ नका, असा सल्लाही त्यांनी विद्यार्थ्यांना दिला. यावेळी किशोरी शिरकर, सुश्रुत पाटील, अनुजा पाटील यांनी मनोगत व्यक्त केले. बाजारात सापडलेले ३ लाख रुपये परत करणाऱ्या दुंडगे (ता. गडहिंग्लज) येथील राजीव सुतार यांचा यावेळी सत्कार करण्यात आला.

यावेळी ७६ स्काऊट गाईड, आर. के. नुली, प्रणिता कुलकर्णी यांच्यासह परीक्षक, मार्गदर्शक शिक्षक उपस्थित होते. राज्य प्रशिक्षण आयुक्त गिरीश कांबळे यांनी प्रास्ताविक केले. उज्ज्वला सातपुते यांनी सूत्रसंचालन केले तर जिल्हा संघटक सुषमा भोसले यांनी आभार मानले.

---

* फोटो ओळी : सोनतळी (जि. कोल्हापूर) येथील स्काऊट गाईड राज्य पुरस्कार शिबिरात माध्यमिक शिक्षणाधिकारी किरण लोहार यांनी मार्गदर्शन केले. यावेळी किशोरी शिरकर, गिरीश कांबळे आदी उपस्थित होते.

क्रमांक : २२०२२०२१-गड-०१