यादववाडीत शाळाच आपल्या घरी

उचगाव : कोरोना संसर्गामुळे दीड वर्षे शाळा बंद आहेत. ऑनलाइन शिक्षणास मर्यादा येत असल्याने, यादववाडी विद्या मंदिर प्राथमिक शाळेतील शिक्षिका पूनम भोपळे यांनी शाळाच आपल्या दारी व विद्यार्थ्यांच्या घरीच बुक बँक हा अभिनव उपक्रम सुरू केला आहे. या उपक्रमाचे उद्घाटन नुकतेच करण्यात आले. पूनम भोपळे यांनी स्व:खर्चातून विद्यार्थ्यांच्या घरातील भिंतीचा वापर करून, सर्व विषयांचे शैक्षणिक तक्ते व अध्ययन साहित्य पुरविले आहे. या उपक्रमामुळे विद्यार्थ्यांच्या वाचनात व लेखनात लक्षणीय वाढ होत आहे. विद्यार्थी टीव्ही किंवा मोबाइलमध्ये गुंतून न राहता, अध्ययन करू लागले आहेत. भिंतीवरील तक्त्याच्या निरीक्षणाद्वारे चिकित्सकपणे अभ्यास करत आहेत. यामुळे सृजशीलता व एकाग्रता वाढून अभ्यासविषयी आवड निर्माण झाली आहे. विशेष म्हणजे, भोपळे यांनी सोबतच ‘घरोघरी फिरते वाचनालय’ हा उपक्रमही सुरू केला आहे. प्रत्येक मुलाच्या घरी प्रत्येकी पाच पुस्तके देण्यात आली आहेत. विद्यार्थ्यानी वाचलेली पुस्तके दुसऱ्या विद्यार्थ्याला देऊन, त्याने वाचलेली पुस्तके आपण घेऊन पुस्तकांची देवाणघेवाण करत आहेत. या नावीन्यपूर्ण उपक्रमाचे उद्घाटन ग्रामपंचायत सदस्य सचिन देशमुख, सचिन गाताडे, शाळा व्यवस्थापन समिती अध्यक्ष महादेव दरुर, दत्तात्रय तोरस्कर व प्रभारी मुख्याध्यापिका मंगल माळी यांच्या हस्ते करण्यात आले.