सागर बगाडे यांनी रंगकर्मींसाठी घातला ‘गोंधळ’

कोल्हापूर : गोंधळ, गणेश गीतांवर नृत्य, गायन या कला सादरीकरणातून कोल्हापुरातील रंगकर्मींनी कलाकारांच्या व्यथा मायबाप रसिकांसमारे मांडल्या. मिरजकर तिकटी येथे झालेल्या या अभिनव आंदाेलनाला आमदार चंद्रकांतदादा पाटील यांनी भेट दिली व सांस्कृतिक कार्यक्रम आणि नाट्यगृहे सुरू करण्यास परवानगी मिळावी यासाठी आपण प्रयत्न करू, असे आश्वासन दिले.

राज्य शासनाने ५ नोव्हेंबरपासून नाट्यगृहांना परवानगी दिली आहे; मात्र सध्या सणांचा कालावधी असल्याने या काळात छोटेखानी कार्यक्रमांना परवानगी मिळावी, अशी कलाकारांची मागणी आहे. यासाठी कोल्हापूर रंगकर्मींच्यावतीने शहरातील विविध चौकांमध्ये कलाबाजार माध्यमातून कलांचे सादरीकरण सुरू आहे. कलाकारांच्या मदतीसाठी मदतफेरीही काढली जात आहे. याअंतर्गत शनिवारी सकाळी ११ वाजता मिरजकर तिकटी येथे कलाकारांनी गोंधळ घातला. श्रद्धा शुक्ल आणि सागर बगाडे यांनी गोंधळ नृत्य केले. भर पावसात या कलाकारांनी आपली कला सादर केली. संभाजीनगर येथील संभाजीनगर तरुण मंडळाच्या गणपतीसमोर साकडे घातले. यात झंकार सुतार, रवी सुतार, महेश सोनुले, वेदा सोनुले, सूरज नाईक, दिनेश माळी, नितीन सोनटक्के, मंजिरी दोडन्नावर, रणजित बुगले यांनी गीते गायली. त्यांना भार्गव कांबळे, गौतम राजहंस, अनिकेत ससाणे यांनी साथसंगत केली. मुकुंद सुतार, सुनील घोरपडे, प्रसाद जमदग्नी, धनंजय पाटील, रोहन घोरपडे, मनोज जोशी, समीर भोरे, अजय खाडे यांनी नियोजन केले. श्रीधर जाधव, रमेश सुतार, शेखर गुळवणी यांनी ध्वनी व्यवस्था केली.

आज कुठे कलाबाजार

आज रविवारी सकाळी ११ वाजता मध्यवर्ती एस. टी. स्टँड, व दुपारी साडेबारा वाजता भगवा चौक, कसबा बावडा, येथे सांस्कृतिक कला बाजार भरणार आहे. तृतीयपंथी संघटनेच्यावतीने मयुरी यांनी पाठिंबा देत कलाकारांना मोर्चा काढावा लागला, तर त्याचे नेतृत्व आम्ही तृतीयपंथी करू, असे आश्वासन दिले.

---

फोटो नं ११०९२०२१-कोल-कलाबाजार

ओळ : कोल्हापूर रंगकर्मींच्यावतीने सुरू असलेल्या ‘कलाबाजार’ या अभिनव आंदोलनात शनिवारी मिरजकर तिकटी येथे सागर बगाडे यांनी गोंधळ नृत्य सादर केले. त्यास लोकांनी प्रतिसाद दिला. (छाया : आदित्य वेल्हाळ)

----