सडोलीत आजी, माजी आमदारांची प्रतिष्ठा पणाला

लोकमत न्यूज नेटवर्क

सडोली (खालसा) : येथील ग्रामपंचायत निवडणूक बिनविरोध करण्यासाठी हालचाली सुरू होत्या; परंतु जागावाटपाचा तिढा न सुटल्याने कॉग्रेस विरुद्ध शेतकरी कामगार पक्ष विरुद्ध भाजप अशी तिरंगी लढत होत आहे. या लढतीत आमदार पी. एन. पाटील, माजी आमदार संपतराव पवार-पाटील, स्वरूपसिंह पवार-पाटील यांची प्रतिष्ठा पणाला लागली आहे.

सडोली (खालसा) ता. करवीर येथील ग्रामपंचायतीची शेतकरी कामगार पक्षाची २५ वर्षांची सत्ता गेल्या निवडणुकीत कॉग्रेसने आठ जागा जिंकून संपुष्टात आणली होती. त्यावेळी शेकापला पाच जागांवर समाधान मानावे लागले होते. आमदार पी. एन. पाटील यांचे भाचे व माजी आमदार संपतराव पवार पाटील यांचे चुलत बंधू असलेले स्वरूपसिंह पवार-पाटील यांनी शेकापपासून फारकत घेत सवता सुभा मांडला आहे. विधानसभा निवडणुकीत ग्रामपंचायत निवडणुकीसाठी तडजोड करून त्यांनी कॉग्रेसबरोबर जाण्याचा निर्णय घेतला.

ग्रामपंचायतीच्या निवडणुकीत विधानसभेला पी. एन. पाटील यांच्या विजयासाठी एकोपा निर्माण झाला होता, तसा ग्रामपंचायत निवडणुकीतही राहावा व गावच्या विकास व्हावा यासाठी उद्योगपती रवी पाटील, ‘गोकुळ’चे संचालक उदय पाटील, पंकज पवार-पाटील, समर पवार, क्रांती पवार, अक्षय पवार यांनी दोन्ही गटांशी प्राथमिक चर्चा करून बैठकाही झाल्या; परंतु तिन्ही गटांत जागावाटपावरून एकमत न झाल्याने तिरंगी निवडणूक होत आहे. आजी-माजी आमदारांसह स्वरूपसिंह पवार-पाटील याची राजकीय वर्चस्वासाठी प्रतिष्ठा पणाला लागली आहे. या निवडणुकीकडे भोगावती खोऱ्याचे लक्ष लागून राहिले आहे.