रस्ते प्रकल्पाची आकडेमोड सुरू

निगेटिव्ह ग्रेडिंगवर भर : उद्या अहवाल पूर्ण होण्याची शक्यता

कोल्हापूर : रस्ते प्रकल्पाची अंतिम किंमत ठरविण्याची घाई महापालिकेच्या सार्वजनिक बांधकाम विभागात सुरू आहे. मंत्री एकनाथ शिंदे यांच्या समितीला अहवाल सादर करण्यापूर्वी शुक्रवारी ‘एमएसआरडी’च्या कार्यालयात बैठक होत आहे. हा अहवाल गुरुवारपर्यंत पूर्ण होईल, अशी माहिती शहर अभियंता तथा समिती सदस्य नेत्रदीप सरनोबत यांनी दिली.
शहरातील वादग्रस्त रस्ते प्रकल्पाची अंतिम किंमत ठरविण्याचे काम महापालिकेत सुरू आहे. यासाठी नोबेल कंपनीने केलेल्या मूल्यांकन अहवालातील तपशीलाची पडताळणी पूर्ण झाली आहे.
‘ए’, ‘बी’, ‘सी’ व ‘डी’ अशी प्रकल्पातील कामाची वर्गवारी करण्यात आली आहे. ‘ए’वर्गात प्रकल्पातील पूर्ण कामे, ‘बी’ वर्गात अपूर्ण कामे, तर ‘सी’ वर्गात केलेली मात्र उपयोगात नसलेली कामे, ‘डी’ वर्गात निकृष्ट कामांचा समावेश करण्यात आला. या सर्वांचे मूल्य करून प्रकल्पाची किंमत ठरविली जाणार आहे. (प्रतिनिधी)