माळवींच्या ठरावात आडकले बजेटचे घोंगडे

‘बजेट’वर सहीची प्रतीक्षा : १७ एप्रिलनंतरच मंजुरी

कोल्हापूर : महापौर तृप्ती माळवी यांचे नगरसेवकपद रद्द करण्याचा ठराव शासनाला पाठविण्याबाबतच्या प्रस्तावावर महापौरांनी अद्याप स्वाक्षरी केलेली नाही. यासह बजेट मंजुरीचे प्रस्तावही महापौरांच्या मंजुरीच्या प्रतीक्षेत आहेत. रस्त्यांची कामे १५ मेनंतर केली जात नाहीत; त्यामुळे किमान बजेटच्या ठरावावर महापौरांची स्वाक्षरी व्हावी, यासाठी नगरसेवक प्रयत्नशील आहेत. दरम्यान, १७ एप्रिलपूर्वी कोणत्याही ठरावावर स्वाक्षरी होणार नसल्याचे सूत्रांनी सांगितले.
महापौर माळवी यांना पदावरून दूर करण्याचा चंग कॉँग्रेस राष्ट्रवादीने बांधला आहे. सभागृहात त्यांचे नगरसेवकपद रद्द करण्याचा ठराव मंजूर केला. नगरसेवकांनी मुख्यमंत्री देवेंद्र फडणवीस यांनाही विनंती केली. महापौरांनी विरोधातील प्रस्तावासह बजेट मंजुरीचे प्रस्तावही रोखले आहेत.
महापालिकेची निवडणूक आॅक्टोबर महिन्यात होत असल्याने नगरसेवकांना बजेट खर्च करण्याची घाई लागली. बजेटमधील बहुतांश रक्कम रस्ते व गटारींसारख्या पायाभूत सुविधांवरच खर्च होणार आहे. हा निधी खर्च करण्यासाठी नगरसेवकांच्या हातात फक्त दीड महिन्याचा कालावधी आहे. १५ मेनंतर रस्ते व गटारींची कामे करता येणार नाहीत. यानंतर पावसाळा व लगेच निवडणुकींचे पडघम वाजणार आहेत. त्यामुळे बजेटच्या प्रस्तावावर महापौरांची स्वाक्षरी व्हावी, यासाठी नगरसेवक प्रयत्न करीत आहेत. सभागृहात व बाहेर राजीनाम्यावरून कोंडी करणाऱ्या नगरसेवकांची महापौरांनी सर्व ठराव रोखून धरत कोंडी सुरू केली. मागील वेळेच्या काही महापौरांनी सहा-सहा महिन्यांपर्यंत ठराव रोखून धरल्याने नगरसेवकांची पंचाईत झाली होती. (प्रतिनिधी)