नवीन आदेशाने वाढणार ‘रेशन’; जिल्ह्यात वाढीव २६ दुकाने

नवीन स्वस्त धान्य दुकान मंजुरीचा आराखडा अंतिम होईपर्यंत राज्यातील शहरी भागात नवीन स्वस्त धान्य दुकान मंजुरीला १३ डिसेंबर २०१८ रोजी स्थगिती दिली होती. ही स्थगिती आता उठविण्यात आली आहे. याबाबतचे पत्र जिल्हा पुरवठा कार्यालयाला १६ सप्टेंबरला मिळाले आहे. त्यामुळे जिल्ह्यात रेशन धान्य दुकानांची संख्या वाढणार आहे. पुरवठा विभागाने याची कार्यवाही सुरू केली असून पहिल्या टप्प्यात जिल्ह्यातील ६ तालुक्यांमध्ये २६ नवीन रेशन दुकान होणार आहे. त्यासाठीचा जाहीरनामा प्रसिद्ध करून प्रस्ताव मागवण्यात आले आहेत. ज्या गावांमध्ये रेशन धान्य दुकाने कमी आहेत, एकाच धान्य दुकानावर अधिक रेशनकार्डधारक आहेत अशा गावांमध्ये नव्याने रेशन दुकाने सुरू करण्यात येत आहेत. यानंतर देखील लोकसंख्येच्या मानाने वाढीव रेशन दुकाने सुरू करण्यात येणार आहेत.

---

जिल्ह्यातील एकूण स्वस्त धान्य दुकाने - १६४१

कोल्हापूर शहर : १६६

इचलकरंजी : १०३

ग्रामीण भाग -१३७२

----

कोठे किती वाढणार

पन्हाळा : मौजे बहिरेवाडी, गुडे सोमवार पेठ, नावली, वारणा, पिंपळे तर्फ सातवे, मौजे कोतोली

कागल : बोरवडे, माद्याळ, पिंपळगाव खुर्द

शाहूवाडी : मोळावडे, वडगाव, करंजोशी, ओकोली, कोळगाव

करवीर : शिरोली दुमाला, येवती, खेबवडे, गर्जन, कळंबे तर्फ कळे, घानवडे, सोनतळी, वसगडे.

आजरा : दाभिल

गगनबावडा : पळसंबे, तळवे बुद्रूक, खोकुली.

--

लाभार्थ्यांची गैरसोय दूर होणार

एका रेशन दुकानाला २ हजार रेशनकार्डधारक असा नियम आहे. एकाच गावातील सर्व रेशन दुकानात त्यापेक्षा जास्त कार्डधारक असतील तर त्यांंच्यासाठी नवीन रेशन दुकानाची सोय असणार आहे. अनेक गावांमध्ये अजूनही रेशन धान्य दुकान नसल्याने तेथील नागरिकांना शेजारच्या गावात जाऊन धान्य आणावे लागते. त्यासाठी कित्येक किलोमीटर लांब जाणे, रांगेत थांबणे, धान्य नसेल तर, परत फेरी मारणे असा आटापिटा करावा लागतो.

--