रमजान ईदही घरच्या घरीच

कोल्हापूर : कोरोनामुळे रमजानचे रोजे घरच्या घरीच केल्यानंतर आता ईदही घरातच आणि साध्या पद्धतीने साजरी करावी लागणार आहे. चार दिवसांवर आलेल्या ईदनिमित्त शिरखुर्म्याचे साहित्य खरेदी करण्यासाठी बाजारपेठेमध्ये वर्दळ वाढली आहे. दरम्यान कोरोनाच्या पार्श्वभूमीवर ईद कशा पद्धतीने साजरी करायची, याबाबतचे धोरण निश्चित करण्यासाठी बुधवारी हिलाल कमिटीची बैठक होत आहे.

मुस्लीम धर्मीयांतील पवित्र रमजान महिन्याची सांगता शुक्रवारी ईद साजरी करून होत आहे. यानिमित्त घराघरांत तयारी सुरू झाली आहे. दरवर्षी बिंदू चाैकात होणारा ईद फेस्टिव्हल यावर्षी होणार नाही. त्यामुळे प्रत्येकाने स्वत:च्या जबाबदारीवर ईदसाठी लागणाऱ्या साहित्याची खरेदी करावयाची आहे. ईद आणि अक्षय तृतीया एकाच दिवशी आल्याने आणि जेवणावळीवर बंदी असल्याने मोजक्याच लोकांसाठी खीर व जेवणाचे बेत सुरू आहेत.

रमजान ईदला घरोघरी शिरखुर्मा असतो, त्यासाठी लागणाऱ्या शेवया, गूळ, साखर, काजू, बदाम, खसखस, चारुले, पिस्ता, आक्रोड, खारीक, वेलदोडे, बेदाणे खरेदी करण्यासाठी बाजारपेठेत सकाळी ७ ते ११ या प्रशासनाने घालून दिलेल्या वेळेत खरेदी सुरू आहे. यावर्षी या मसाल्याच्या दरात काहीशी वाढ दिसत आहे.

नवीन कपडे खरेदी नाही

ईद म्हटले की नवे कपडे आलेच; पण यावर्षीला याला मुरड घालावी लागणार आहे. लॉकडाऊनमुळे कपड्यांची दुकाने बंद असल्याने नवीन कपडे खरेदी अथवा शिवूनही घेता येत नाहीत. जुन्या ठेवणीतील कपड्यावरच ईद करावी लागणार आहे.

सामूहिक नमाज पठण नाही

मुस्लीम बोर्डिंग पटांगणासह जिल्ह्यात सर्व मशीद व ईदगाह मैदानावर ईदनिमित्त नमाज पठण होणार नाही. फक्त पाच जणांच्या उपस्थितीत मुस्लीम बाेर्डिंगमध्ये औपचारिक पद्धतीने नमाज पठाण होईल, असे मुस्लीम बोर्डिंगचे चेअरमन गणी आजरेकर यांनी सांगितले.