पुईखडी एअर व्हॉल्व्ह गळतीने लाखो लिटर पाणी वाया

कळंबा : पुईखडी जलशुद्धिकरण केंद्रातून उपनगरास पाणीपुरवठा करणाऱ्या मुख्य जलवाहिनीवरील एअर व्हॉल्व्ह मंगळवारी रात्री खराब होऊन रात्रभर लाखो लिटर पाण्याची नासाडी झाली. संबंधित गळतीची माहिती प्रशासनास माजी नगरसेविका मनीषा कुंभार यांनी वेळेत देऊनही दुरुस्ती करण्यासाठी पाणीपुरवठा वितरण विभागाच्या प्रशासनास गुरुवारी सकाळी मुहूर्त मिळाला. गुरुवारी सकाळी दुरुस्ती करून पुन्हा चाचणी घेण्यात येऊन गळती बंद करण्यात प्रशासनास यश मिळाले.

उंचावरून सखल भागात पाणी वाहून नेणाऱ्या मुख्य जलवहिनीत बऱ्याचदा हवा साठून राहते. त्यामुळे व्हॉल्व्ह खराब होतात. ज्यामुळे मुख्य जलवाहिनी खराब होण्याची शक्यता असते. उपनगरात विविध मुख्य जलवाहिनीवर बसविण्यात आलेल्या एअर व्हॉल्व्हची दर तीन महिन्यांत देखभाल दुरुस्ती करणे आवश्यक आहे.

मुळात पाणीपुरवठा वितरण विभागाकडे अपुरा कर्मचारी वर्ग असल्याने ही कामे परिणामकारकरीत्या होत नसल्याने अनेक ठिकाणी पाण्याचे कारंजे अनुभवण्यास मिळत आहेत. एअर व्हॉल्व्ह देखभाल दुरुस्तीचे काम संबंधित ठेकेदाराचे असते. त्याचेही याप्रश्नी दुर्लक्ष झाल्याने अनेक ठिकाणी एअर व्हॉल्व्ह खराब झाले आहेत .

पुईखडी जलशुद्धिकरण केंद्रातून उपनगरात जाणाऱ्या जलवाहिनीचा एअर व्हॉल्व्ह खराब होऊन दोन दिवसांनंतर गुरुवारी सकाळी दुरुस्ती करण्यात आल्याने ऐन उन्हाळ्यात लाखो लिटर पाण्याची नासाडी झाल्याचे नागरिकांनी अनुभवले.

फोटो : २२ कळंबा पुईखडी पाणीपुरवठा

पुईखडी जलशुद्धिकरण केंद्रातून जाणाऱ्या जलवाहिनीचा एअर व्हॉल्व्ह मंगळवारी रात्री खराब होऊन पाण्याचे कारंजे उडत होते. गुरुवारी सकाळी त्याची प्रशासनाने दुरुस्ती केली.