जयसिंगपुरात शिवपुतळ्यासाठी तीन कोटींची तरतूद

जयसिंगपूर : छत्रपती शिवाजी महाराज यांच्या पुतळ्याची जागा भूसंपादन करण्याबरोबरच म्युझियम बांधणे व पुतळा उभा करण्यासाठी तीन कोटी दहा लाख रुपयांची तरतूद जयसिंगपूर पालिकेच्या अर्थसंकल्प सभेत करण्यात आली. पालिकेच्या या निर्णयामुळे शिवपुतळा उभारण्याचा प्रश्न आता मार्गी लागणार आहे. शहराला २४ तास पाणीपुरवठा करण्यासाठी १८ कोटींचा प्रकल्प व नगरपालिकेची नवीन इमारत बांधण्यासाठी दहा कोटी रुपयांची तरतूदही अर्थसंकल्पात करण्यात आली.

जयसिंगपूर पालिकेची सोमवारी सन २०२०-२१ च्या सुधारित व २०२१-२२ च्या प्रस्तावित अंदाजपत्रकास मंजुरी देणे या विषयावर ऑनलाईन विशेष सभा पार पडली. अध्यक्षस्थानी नगराध्यक्षा डॉ. नीता माने होत्या. यावेळी उपनगराध्यक्ष संजय पाटील-यड्रावकर, मुख्याधिकारी टिना गवळी, लेखापरीक्षक राजेश पोवार, लेखापाल राजेंद्र महिंदरकर, नगरसेवक व विभागप्रमुख उपस्थित होते.

अंदाजपत्रकात आस्थापना खर्च, पाणीपुरवठा, महिला बालकल्याण, आर्थिक दुर्बल घटक, वृक्ष लागवडीकरण, कचरा संकलन व प्रक्रिया, औषध फवारणी व स्वच्छता खर्च यावर तरतूद करण्यात आली असून, उत्पन्न व खर्च याबाबत सविस्तर माहिती सभेत देण्यात आली. महसूल करातून सहा कोटी ४१ लाख रुपयांचा कर, तर भांडवली जमा ३३ कोटी २८ लाख ५० हजार रुपये असे उत्पन्न अपेक्षित आहे.

-------------------------

चौकट -

अर्थसंकल्पात यावर तरतुदी

येत्या आर्थिक वर्षात शहराला २४ तास पाणीपुरवठा प्रकल्प उभारणे, नगरपालिका नवीन प्रशासकीय इमारत उभारणे, छत्रपती शिवाजी महाराज यांचा पुतळा उभा करण्यासाठी जमीन भूसंपादन, म्युझियम बांधणे व पुतळा उभारण्यासाठी तीन कोटी दहा लाख रुपयांची तरतूद अर्थसंकल्पात करण्यात आली आहे.

-------------------------------

चौकट -

पालिकेचा १३३ कोटींचा अर्थसंकल्प

कोणतीही करवाढ न करता जयसिंगपूर नगरपालिकेच्या अर्थसंकल्पीय सभेत सन २०२०-२१ च्या २९ कोटी ४८ लाख रुपये शिलकी अंदाजपत्रकाला मंजुरी देण्यात आली. सभेत सन २०२१-२२ च्या एकूण १३३ कोटी ५० लाख रुपयांच्या अंदाजपत्रकाला मंजुरी देण्यात आली. नगरपरिषद शिक्षण मंडळासाठी ८७ लाख रुपयांची अंदाजपत्रकात तरतूद करण्यात आली आहे.

फोटो - छत्रपती शिवाजी महाराजांचे छायाचित्र वापरावे.