जयसिंगपूर प्राथमिक आरोग्य केंद्रात पुरेशी लस द्या

जयसिंगपूर : शहराची लोकसंख्या लक्षात घेत योग्य त्या प्रमाणात लसीची उपलब्धता करावी, या मागणीसाठी गुरुवारी प्राथमिक आरोग्य केंद्रातच नगरसेवक बजरंग खामकर, स्वाभिमानीचे सागर मादनाईक यांच्यासह कार्यकर्त्यांनी ठिय्या आंदोलन केले. शहराच्या लोकसंख्येच्या मानाने लसीचा पुरवठा अपुरा असला तरी जास्तीत जास्त लस उपलब्ध करण्यासाठी आम्ही प्रयत्नशील आहे, असे वैद्यकीय अधिकारी डॉ. पांडुरंग खटावकर यांनी आंदोलकांना सांगितल्यानंतर आंदोलन मागे घेण्यात आले.

येथील प्राथमिक आरोग्य केंद्रात कोरोनाप्रतिबंधक लस घेण्यासाठी नागरिकांची गर्दी वाढू लागली आहे. अनेकांना लसीशिवाय परत जावे लागत आहे. शहराच्या लोकसंख्येच्या मानाने कोविड प्रतिबंधक लसी उपलब्ध करण्याकरिता पाठपुरावा करावा. येत्या ३० एप्रिलअखेर शहरातील ४५ वर्षांवरील नागरिकांचे लसीकरण पूर्ण करावे, अशी विनंतीही यावेळी करण्यात आली.

यावेळी वैद्यकीय अधिकारी डॉ. पांडुरंग खटावकर म्हणाले, शासनाकडून दररोज तीनशे ते पाचशे लस उपलब्ध होत आहेत. त्यातील निम्म्याहून अधिक लसी ग्रामीण भागाला पाठवल्यानंतर जयसिंगपूर शहराकरिता केवळ शंभर-सव्वाशे लसी शिल्लक राहतात. जयसिंगपूर शहराची संख्या लक्षात घेता उपलब्ध असणारे लस डोस अपुरे पडतात. त्यामुळे नागरिकांना दुसऱ्या दिवशीकरिता टोकन देण्यात येत असल्याचे त्यांनी सांगितले.

फोटो - २२०४२०२१-जेएवाय-०३

फोटो ओळ - जयसिंगपूर येथील प्राथमिक आरोग्य केंद्रात ठिय्या आंदोलनात सहभागी झालेले बजरंग खामकर, सागर मादनाईक यांच्यासह कार्यकर्ते.