वीज यंत्रणा धोकादायक आहे, मग व्हाॅॅट्सॲपद्वारे करा तक्रार

महावितरणला कायम वीज सुरक्षेवरून नागरिकांकडून धारेवर धरले जाते. यंत्रणेच्या चुकांमुळे बऱ्याचवेळी शेतकऱ्यांसह नागरिक व जनावरांनाही विजेचा धक्का बसून जीव गमावण्याची वेळ आली आहे. आता तर गळीत हंगाम सुरू असल्याने उसाच्या वाहनांना विद्युत तारांचा स्पर्श होण्याच्या घटना घडत आहे. या पार्श्वभूमीवर महावितरणने विद्युत सुरक्षेसाठी हा उपक्रम हाती घेतला आहे.

व्हॉटस्ॲपद्वारे प्राप्त झालेली फोटोसह माहिती किंवा तक्रार लगेचच संबंधित विभागीय व उपविभागीय कार्यालयात पाठवून वीजयंत्रणेच्या दुरुस्तीचे काम केले जाते. ते झाल्यानंतर संबंधित तक्रारकर्त्यांना व्हॉटस्ॲपद्वारेच दुरुस्तीनंतरचे छायाचित्र पाठवून दिले जाते.

नागरिकांनी पाठविलेल्या काही तक्रारींचे निवारण करण्यासाठी वरिष्ठ कार्यालयांची मंजुरी, निधी किंवा शिफ्टिंगची गरज असल्यास तसे प्रस्ताव वरिष्ठ कार्यालयाकडे पाठविण्यात येतील व त्याबाबत संबंधित तक्रारकर्त्यांना कळविण्यात येणार आहे. महावितरणच्या या उपक्रमाला सार्वजनिक वीज सुरक्षेसाठी प्रतिसाद द्यावा व सहकार्य करावे, असे आवाहन पुणे प्रादेशिक संचालक अंकुश नाळे यांनी केले आहे.

चौकट ०१

कोल्हापूर जिल्ह्यासाठी ७८७५७६९१०३ हा व्हॉट्सॲप मोबाईल क्रमांक उपलब्ध करून दिला आहे. या क्रमांकावर फक्त वीजवितरण यंत्रणेपासून सुरक्षेचा धोका असल्याचा फोटो व संपूर्ण पत्ता किंवा लोकेशनसह माहिती, तक्रारी स्वीकारण्यात येत आहेत. या क्रमांकावर नागरिकांना कॉल करण्याऐवजी फक्त व्हॉटस्ॲपद्वारे माहिती द्यावी. तसेच ज्या नागरिकांकडे व्हॉटस्ॲप नाहीत, त्यांनी ‘एसएमएस’द्वारे या मोबाईल क्रमांकावर माहिती दिल्यास त्याचेही निराकरण करण्यात येणार आहे.