शियेत क्रशर चौकात खड्डेच खड्डे

शिये : शिये गावातील शिये - निगवे या रहदारीच्या मार्गावर असलेल्या क्रशर चौकातील रस्त्याची सध्या प्रचंड दुरवस्था झाली आहे. या चौकातील रस्त्यावर मोठे खड्डे पडल्याने वाहनधारकांना मरणयातना सोसाव्या लागत आहेत. त्यामुळे सार्वजनिक बांधकाम विभागाने या रस्त्यावरील खड्डे त्वरित बुजवावेत, अशी मागणी होत आहे. दरम्यान, या रस्त्याच्या कामासाठी सुमारे दीड कोटी रुपयांची निविदा मंजूर आहे. मात्र, प्रत्यक्ष कामाला सुरुवात करण्यात आली नसल्याने आश्चर्य व्यक्त होत आहे.

पुणे - बेंगलोर राष्ट्रीय महामार्गावरून पन्हाळा, ज्योतिबा, रत्नागिरीकडे जाण्यासाठी राज्य मार्ग १९४ सोयीचा आहे. निगवे, भुयेसह परिसरातील पंधराशे ते दोन हजार कामगार हे शिरोली औद्योगिक वसाहतीकडे याच मार्गावरून ये-जा करतात. शियेतील क्रशर चौकात मात्र रस्त्यावर मोठे खड्डे पडल्याने त्यांना रोजच खड्ड्यांचा अडथळा पार करत जावे लागते. अनेकदा खड्डे चुकविण्याच्या नादात छोटे-मोठे अपघात झाले आहेत. वाहन मागे-पुढे घेण्यावरूनही वादाचे प्रसंग घडत आहेत. त्यामुळे या मार्गावरील खड्डे बुजवावेत, अशी मागणी होत आहे.

चौकट : शियेतील शिवाजीनगर, क्रशर परिसरात रस्त्याच्या दुतर्फा असलेली गटारे पूर्णपणे बुजली आहेत. त्यामुळे पावसाचे पाणी रस्त्यावरून मोठ्या प्रमाणात वाहते. त्यामुळे रस्त्यावर मोठे खड्डे पडले आहेत. या परिसरात रस्त्याच्या दक्षिणेला व उत्तरेला स्टोन क्रशर आहेत. शिये - टोप येथून दगड, खडी, क्रशसॅन्ड घेऊन जाणारे डंपर, ज्योतिबा - पन्हाळा व रत्नागिरीकडे ये - जा करणारी अवजड वाहने यामुळे या रस्त्यावर मोठी वर्दळ असते. त्यामुळे या रस्त्यावरील खड्ड्यांकडे सार्वजनिक बांधकाम विभागाकडून का दुर्लक्ष होत आहे, असा प्रश्न उपस्थित होत आहे.

कोट : क्रशर परिसरातील मुख्य रस्त्यावर पडलेल्या खड्ड्यांविषयी ग्रामपंचायतीच्यावतीने सार्वजनिक बांधकाम विभागाकडे पाठपुरावा करून वाहनधारकांची गैरसोय दूर करू.

- रेखा जाधव, सरपंच, शिये

कोट : क्रशर परिसरात वाहनांची वर्दळ वाढली आहे. त्यामुळे या परिसरातील रस्त्यांवर पडलेले खड्डे बुजवून वाहनधारकांची गैरसोय दूर करावी.

- अमर शिसाळ, वाहनधारक, शिये

कोट : क्रशर चौकातील दोनशे सत्तर मीटर लांबीच्या सिमेंटच्या रस्त्यासाठी दीड कोटी रुपयांची निविदा मंजूर असून, लवकरच या कामाची सुरुवात होईल.

- सी. एन. भोसले, शाखा अभियंता, सार्वजनिक बांधकाम विभाग.

....................

.....................................

फोटो ओळ :

शिये (ता. करवीर) येथील क्रशर परिसरात रस्त्यावर खड्डे पडले आहेत. (छाया - हरी बुवा)

Att