वडगावमध्ये कुत्र्यांच्या बिस्कीट गँगची दहशत

सुहास जाधव/लोकमत न्यूज नेटवर्क

पेठवडगाव : वडगाव नगरपालिका क्षेत्रात सध्या भटक्या कुत्र्यांचा उपद्रव वाढला आहे. त्यात भरीस भर म्हणून प्राण्यांवर भूतदया दाखवणाऱ्या काही लोकांमुळे नवीन वसाहत परिसरात कुत्र्यांच्या एका टोळक्याची पाळीव प्राणी, माणसांवर हल्ले करण्यापर्यंत मजल गेली आहे. बिस्किटाच्या अमिषाने लाडावलेल्या या बिस्कीट गँगमुळे नवीन वसाहतीमधील नागरिक त्रस्त झाले आहेत.

शहराच्या पूर्वेकडील नवीन वसाहत, विद्या कॉलनी परिसरात भटक्या कुत्र्यांची संख्या मोठ्या प्रमाणात वाढली आहे. परिसरात मोठ्या प्रमाणात मोकळी जागा असल्यामुळे दिवसभर ही कुत्री येथे पहुडलेली असतात. तसेच नवीन वसाहतीमधील काही नागरिक या कुत्र्यांना वारंवार बिस्किटे खाऊ घालतात. त्यामुळे येथे बिस्किटांच्या आशेने टोळके तयार झाले असून दिवसेंदिवस त्यांचा उपद्रव वाढत आहे. गेल्या आठवड्यात या कुत्र्यांनी एका बंगल्यातील बोकडावर हल्ला करत त्याचा फडशा पाडला. तर मंगळवार रात्री एका दुचाकीस्वाराचा पाठलाग केला. नशीब बलवत्तर म्हणून दुचाकीस्वार त्यांच्या तावडीतून बचावला.

दिवसेंदिवस ही कुत्री आक्रमक होत असून त्यांचा परिसरातील वृद्ध, लहान मुलांनादेखील धोका निर्माण झाला आहे. नगरपालिका प्रशासनाने वेळीच यावर उपाययोजना करून कुत्र्यांच्या टोळक्याचा बंदोबस्त करावा, अशी मागणी होत आहे. त्याचप्रमाणे शहरातील इतर भागातील देखील कुत्र्यांच्या वाढत्या उपद्रवाबद्दल उपाययोजना करण्याची गरज आहे.

अन्न सहज उपलब्ध

चौकातील चिकनची दुकाने, मटण मार्केट, मासे बाजार यांच्या खराब भागामुळे कुत्र्यांना आरामात खाद्य उपलब्ध होत आहे. त्यामुळे त्यांची संख्या वाढत आहे. आंबेडकर चौक, सिद्धार्थनगर परिसर, भादोले रस्ता, नवीन वसाहत, पोलीस ठाणे परिसरात अशा मोकाट कुत्र्यांचा त्रास जास्त वाढला आहे.

कोट

नवीन वसाहतसह शहरात मोकाट कुत्र्यांचा उपद्रव मोठ्या प्रमाणात वाढलेला आहे. झुंडीने कुत्री ठाण मांडून बसतात. त्याचा वयोवृद्ध, लहान मुलांना त्रास होत आहे. झुंडी हल्ला करतात. कंपाऊंडवरून घरात प्रवेश करतात. चपला, बूट पळून नेतात. दुचाकीच्या सीटकव्हरचे नुकसान करतात. अशा भटक्या कुत्र्यांचा पालिकेने बंदोबस्त करावा.- प्राचार्य एन. के. शिंदे,

फोटो : ११ वडगाव डॉग