‘खाकी’ची दुसऱ्या लाटेत कोरोनावर मात

लोकमत न्यूज नेटवर्क

कोल्हापूर : रस्त्यावर अविरत कर्तव्य निभावत सर्वसामान्यांना सुरक्षा देणाऱ्या पोलिसांनी व्यायाम, प्राणायम, संत्री-मोसंबी यांचे ज्यूस, अंडी, मांसाहारी पदार्थासह हिरव्या भाज्या, फळे यांचा आहारात समावेश केल्याने त्यांच्या रोगप्रतिकारकशक्तीमध्ये वाढ झाली. परिणामी, कोरोनाच्या दुसऱ्या लाटेत बाधित पोलिसांची संख्या घसरली. अवघे ८२ पोलीस अधिकारी व कर्मचारी बाधित झाले.

कोरोना संसर्गात पोलिसांना ‘फ्रंट वॉरिअर्स’ म्हणून संबोधले. पहिल्या लाटेत सुमारे तीन हजार पोलिसांपैकी ३५८ जणांना बाधा झाली. दोघा कर्मचाऱ्यांचा जीव गेला. तत्कालीन पोलीस अधीक्षक डॉ. अभिनव देशमुख यांनी पोलीस व त्यांच्या कुटुंबासाठी विशेष काळजी घेत स्वतंत्र कोविड सेंटर सुरू करून पोलिसांना मृत्यूच्या दाढेतून बाहेर काढले. दुसऱ्या लाटेत पोलीस अधीक्षक शैलेश बलकवडे यांनीही पोलिसांची काळजी घेत त्यांना व्यायामाचे महत्त्व पटवून प्रतिकारशक्ती वाढविण्यासाठी प्रयत्न केले. जास्तीत जास्त पोलिसांचेही लसीकरण केले. परिणामी दुसऱ्या लाटेत अवघे ८२ पोलिसांना बाधा झाली. सध्याच्या स्थितीत ९८ टक्के पोलिसांचे लसीकरण पूर्ण झाले. कुटुंबातील व्यक्ती पॉझिटिव्ह येताना पोलिसांचे अहवाल मात्र निगेटिव्ह आल्याची सकारात्मक बाजू असल्याचे अधीक्षक बलकवडे यांनी सांगितले.

प्रतिकारशक्ती वाढविण्यासाठी...

रोगप्रतिकारशक्ती वाढविण्यासाठी पोलिसांकडून रोज व्यायाम, चालणे, प्राणायम, योगासह फळे, हिरव्या पालेभाज्यांचा आहारात समावेश केला जात आहे. पौष्टिक व प्रोटीनयुक्त आहारावर भर दिला जात आहे. ड्यूटीवर असलेल्या पोलिसांचे मानसिक आरोग्य सक्षम ठेवण्यासाठी समुपदेशन केले जात होते.

कोट..

पहिल्या लाटेतून कोरोनामुक्त झाल्यानंतर नियमित व्यायाम, सकस आहाराबरोबरच ड्यूटीच्या ठिकाणी पोलीस अधिकाऱ्यांनी दिलेला मानसिक आधार, घरीचे वातावरण हे रोगप्रतिकाकशक्ती वाढविण्यास कारणीभूत ठरले. कोरोनामुक्तीसाठी मानसिकदृष्ट्या सक्षम असणे महत्त्वाचे आहे.

- विजय कारंडे, पोलीस हवालदार.

कोट...

कोरोनाची भीती बाळगू नये, मनातून धास्ती काढून टाकली पाहिजे. योग्य आहार, नियमित व्यायाम तसेच सकारात्मक विचार हे रोगप्रतिकारकशक्ती वाढीस कारणीभूत ठरले आहे. कोरोना प्रतिबंधक लसीकरणाचाही मोठा फायदा झाला आहे.

- रणजीत देसाई, पोलीस नाईक.

कोट..

कोरोनामुक्तीनंतर महिनाभर त्रास झाला; पण त्यानंतर व्यायाम, चालणे, योगासने केली. तणावमुक्त राहण्यासाठी सकारात्मक विचारसरणी अंगीकरणे आवश्यक आहे. सकस आहारासह ड्रायफूडसवरही भर दिला. त्यामुळे आज पुन्हा बंदोबस्तासाठी तंदुरुस्त झालो.

- सलीम शेख, पोलीस हेड कॉन्स्टेबल.

कोट...

दुसऱ्या लाटेत जास्तीत जास्त पोलिसांच्या लसीकरणासह त्यांच्या व्यायामावर भर दिला. त्यामुळे बाधित पोलिसांची संख्या कमी झाली. त्याशिवाय त्यांच्यात सकारात्मक वृत्ती वाढविण्यास मदत केली. इतर रुग्णसंख्या वाढताना कर्तव्यावरील पोलीस बाधित होण्यापासून अलिप्त राहिले.

- शैलेश बलकवडे, पोलीस अधीक्षक, कोल्हापूर

पॉइंटर...

पहिली लाट...

- एकूण कोरोनाबाधित : ४९५२७

- मृत्यू : १७०५

- पोलीस : ३५८

- मृत्यू : ०२

दुसरी लाट...

- एकूण कोरोनाबाधित : ४५०७६

- मृत्यू : १५६५

-पोलीस : ८२

- मृत्यू : ००