गोरे बंधूसह तेरा जणांवर सदोष मनुष्यवधाचा गुन्हा

बोथे स्फोट : एटीएसने केली घटनास्थळाची पाहणी

सातारा : माण तालुक्यातील बोथे जिलेटिन स्फोटप्रकरणी ‘बोथे विंड फार्मा डेव्हलपमेंट प्रायव्हेट लिमिटेड’ आणि ‘कमल एंटरप्रायजेस’वर सदोष मनुष्यवध तसेच भारतीय स्फोटके अधिनियमानुसार गुन्हा दाखल केल्याची माहिती दहिवडी पोलीस ठाण्यातून देण्यात आली. गुन्हा दाखल झालेल्यांमध्ये ‘कमल एंटरप्रायजेस’चे संचालक शेखर, अंकुश, इरफान, राजेश तसेच ‘बोथे विंड फार्मा’चे अरविंद मन्सल, सूरज बारी, आशिष स्वरूप, आर. के. शर्मा, अरुण फूल, राजेंद्र व्हटकर, ए. प्रतिभान, राकेश विश्वकर्मा, अर्पित वाजपेयी यांचा समावेश आहे.
माण तालुक्यातील बोथे येथे शुक्रवार, दि. ९ रोजी सकाळी नऊ वाजता झालेल्या जिलेटिन कांड्याच्या स्फोटात दादासाहेब जगदाळे, संदीप माने, शशिकांत कुलकर्णी हे ठार, तर जावेद मुलाणी, संदीप घाडगे, सूर्याजी शिंदे, शिवाजी सातव, बापू घाडगे हे जखमी झाले होते.
बोथे घटनेनंतर संपूर्ण जिल्ह्यात खळबळ उडाली. मात्र, स्फोट ज्या ठिकाणी झाला ते शेड ‘कंटिनम एनर्जी’, ‘बोथे विंड फार्मा’ की ‘कमल एंटरप्रायजेस’चे आहे, याचीच माहिती घेण्याचे काम सुरू होते. मात्र, हे शेड ‘कमल एंटरप्रायजेस’चे असून, येथील जिलेटिन ‘बोथे विंड फार्मा’ आणि ‘कमल एंटरप्रायजेस’चे असल्याचे स्पष्ट झाले.
यानंतर गुन्हा दाखल करण्याची प्रक्रिया वेगाने सुरू झाली. या प्रकरणात दहिवडी पोलीस ठाण्याचे सहायक पोलीस निरीक्षक समाधान चवरे यांनी स्वत: फिर्याद दिली असून, तेरा जणांवर गुन्हा दाखल केला आहे. या प्रकरणाचा तपास वडूज पोलीस ठाण्याचे निरीक्षक प्रमोद जाधव करत आहेत.
दरम्यान, शनिवारी येथे दहशतवादविरोधी पथक तथा ‘एटीएस’ आणि भारतीय स्फोटके संचालनालयाच्या अधिकाऱ्यांनी पाहणी केली आणि माहिती घेतली. रात्री उशिरापर्यंत दिल्ली येथून आलेले पथक दहिवडी पोलीस ठाण्यात या संबंधात माहिती घेत होते.
संशयितांच्या शोधासाठी एलसीबी
पोलीस उपाधीक्षक राहुल माकणीकर यांनी दिलेल्या माहितीनुसार बोथे जिलेटिन स्फोट प्रकरणात शेखर गोरे, अंकुश गोरे यांच्यासह तेराजणांवर गुन्हा दाखल झाला आहे. यामध्ये बोथे विंड फार्मा डेव्हलपमेंट प्रायव्हेट लिमिटेड आणि कमल एंटरप्रायजेसचे संचालक तसेच कर्मचारी आहेत. यापैकी तीन कर्मचाऱ्यांना शुक्रवारीच चौकशीसाठी ताब्यात घेतल्याची माहिती पोलीस अधीक्षक डॉ. अभिनव देशमुख यांनी दिली होती. तीन कर्मचारी अजूनही दहिवडी पोलीस ठाण्याच्या ताब्यात असून, त्यांची नावे सांगण्यास मात्र पोलिसांनी नकार दिला. मात्र, ज्यांच्यावर गुन्हे दाखल झाले आहेत, त्यांची माहिती काही प्रमाणात दहिवडी पोलिसांना उपलब्ध नाही. परिणामी त्यांच्या शोधासाठी सातारा स्थानिक गुन्हे शाखेची दोन पथके तयार करण्यात आली असून, ती विविध भागांमध्ये पाठविण्यात आली आहेत. ही पथके कोणत्या भागात पाठविण्यात आली आहेत, हे सांगण्यास पोलिसांनी नकार दिला. (प्रतिनिधी)