फये प्रकल्पाला एक कोटी नव्वद लाखांचा निधी मंजूर

गारगोटी : भुदरगड तालुक्यातील फये लघु पाटबंधारे प्रकल्पाचे काम २००४ मध्ये पूर्ण झाले आहे. या प्रकल्पामुळे फये, हेदवडे, कोळवण, नवरसवाडी यासोबतच अनेक वाड्या व वस्त्यांना शेतीसाठी व पिण्याचे पाणी मुबलक प्रमाणात उपलब्ध होत आहे. यामुळे हा भाग हिरवागार होण्यास मदत होते. परंतु अलीकडच्या काळात प्रकल्पाच्या बंधाऱ्यातून व व्हॉल्व्हमधून पाण्याची गळती मोठ्या प्रमाणात होत असल्याने प्रकल्पास धोका निर्माण होऊ शकतो. आमदार प्रकाश आबिटकर यांच्या प्रयत्नातून या बंधाऱ्याच्या दुरूस्तीकरिता १ कोटी ९० लाख रुपयांचा निधी मंजूर करून आणला आहे. गळती काढण्यासाठी प्रकल्पातील पाणी सोडावे लागणार आहे. यामुळे शेतीचे व नागरिकांच्या पिण्याच्या पाण्याची अडचण निर्माण होणार आहे. यामुळे शेतकऱ्यांसमवेत चर्चा करण्यासाठी बैठकीचे आयोजन करण्यात आले होते.

यावेळी आमदार प्रकाश आबिटकर म्हणाले, प्रकल्पाला गळती असल्यामुळे प्रकल्प पूर्ण क्षमतेने भरत नाही. त्यामुळे एकूण पाणी साठ्याच्या ६५ टक्के पाणी शेतकऱ्यांना व नागरिकांना वापरता येते. त्यामुळे प्रकल्पाची दुरूस्ती आवश्यक आहे. या गळतीमुळे कोणताही अनुचित प्रकार होऊ नये, यासाठी हे काम करणे अत्यंत आवश्यक आहे. दुरुस्तीनंतर प्रकल्पात पूर्ण क्षमतेने पाणी साठल्यास शेतीसाठी व पिण्यासाठी मुबलक पाणी उपलब्ध होणार आहे. यामुळे यावर्षी शेतीचे नुकसान होणार असले, तरी प्रकल्पाच्या सुरक्षिततेसाठी हे काम करणे गरजेचे आहे. यासाठी भागातील शेतकऱ्यांनी सहकार्य करावे, असे आवाहन केले.

यावेळी कार्यकारी अभियंता स्मिता माने यांनी प्रकल्पाच्या सर्व तांत्रिक बाबी शेतकऱ्यांना सांगून लवकरात-लवकर दर्जेदार काम करण्यासाठी प्रयत्नशील असल्याचे सांगितले. यावेळी दामोदर पाटील, अनंत डोंगरकर, दिनकर देसाई यांनी मनोगते व्यक्त केले. बाजार समितीचे संचालक कल्याणराव निकम, सभापती आक्काताई नलवडे, शाखा अभियंता संभाजी भोपळे, कोळवण सरपंच दिनकर गुरव, हेदवडे सरपचं पांडुरंग देसाई, दिनकर देसाई, आर. के. पाटील, शंकर देसाई, धनाजी गुरव, प्रकाश कडव, दामाजी पाटील, अरविंद गुरव, महिपती पाटील, संजय पाटील, अविनाश देसाई, सुनील देसाई, तानाजी पांगम, रवी फुटाणे, विष्णुपंत केसरकर उपस्थित होते.