आयपीएल क्रिकेट बेटिंगप्रकरणी एकास अटक

कोल्हापूर : आयपीएल क्रिकेट सामन्यावर बेटिंग घेणाऱ्या एकास स्थानिक गुन्हे अन्वेषण पथकाने छापा टाकून अटक केली. आसिफ निसार कुडचीकर (वय ५२, रा. क्रांतिसिंह नाना पाटीलनगर, कोल्हापूर) असे अटक केलेल्याचे नाव आहे. त्याच्याकडून २४ हजार ७०० रुपये रोख व पाच मोबाईल संचांसह सुमारे ५३ हजार ३०२ रुपयांचा मुद्देमाल जप्त केला. ही कारवाई टाकाळा परिसरातील माळी कॉलनीत निवारा अपार्टमेंटमध्ये मंगळवारी रात्री उशिरा केली.

मंगळवारी पंजाब किंग्ज विरुध्द राजस्थान रॉयल्स हा क्रिकेट सामना सुरु असताना टाकाळा परिसरातील माळी कॉलनीतील निवारा अपार्टमेंटमधील एका फ्लॅटमध्ये बेटिंगचा जुगार खेळ घेत असल्याची माहिती स्थानिक गुन्हे अन्वेषण पथकास मिळाली. त्यानुसार पोलिसांनी त्या अपार्टमेंटवर छापा टाकला. त्यावेळी संशयित आरोपी आसिफ कुडचीकर हा मोबाईल फोनद्वारे क्रिकेट बेटिंगचा जुगार खेळ घेत असल्याचे निदर्शनास आले. त्याला पोलिसांनी पकडले. त्याच्या ताब्यातून रोकडसह एकूण ५३ हजारांचा मुद्देमाल जप्त केला.