पेठ वडगावला दीड, हातकणंगलेला एक कोटीचा निधी

लोकमत न्यूज नेटवर्क

पेठवडगाव : कोरोनाच्या काळातदेखील वडगाव नगरपालिकेस रस्ता अनुदानातून दीड कोटीचा निधीचा शासनाने दिला आहे. वडगाव शहराच्या सर्वांगीण विकासासाठी आपण प्रयत्नशील असून, परिस्थिती सुधारताच आणखी निधी आणण्यात येईल, अशी माहिती आमदार राजू आवळे यांनी पत्रकार परिषदेत दिली.

यावेळी आमदार आवळे म्हणाले, वडगावात प्रत्येक प्रभागात रस्ते झाले पाहिजेत अशा सूचना नगराध्यक्ष मोहनलाल माळी यांना दिल्या होत्या.

वडगाव शहरासाठी आमदार निधीचा पहिलाच २५ लाखांचा निधी छत्रपती शिवाजी महाराज पुतळा सुशोभीकरणासाठी दिलेला आहे. त्यानंतर शहरासाठी वर्षभरात एक कोटी ९० लाखांचा निधी उपलब्ध करून दिला आहे.

शासनाकडून अडीच कोटी रुपये रस्ता अनुदानासाठी दिले होते. यातील वडगाव, हातकणंगलेला जास्तीत जास्त निधी मिळावा अशी मागणी केली होती. त्यानुसार वडगाव पालिकेस दीड, तर हातकणंगले पालिकेस एक कोटी निधी मंजूर करण्यात आला आहे.

वडगाव पालिकेस निधीसाठी गटनेत्या प्रविता सालपे, विरोधी पक्षनेत्या विद्या पोळ, काँग्रेस शहराध्यक्ष सचिन चव्हाण, अजय थोरात, आदींसह कार्यकर्ते यांनी पाठपुरावा केला.

या निधीतून शहराअंतर्गत रस्ते खडीकरण व डांबरीकरण करण्यात येणार आहे; तर यादव काॅलनी ते बबन जाधव घर यथे आरसीसी गटारी करण्यात येणार आहे.

तालुक्यात बाबासाहेब आंबेडकर वसतिगृहात कोविड रुग्णांची सोय करण्यात आली होती; पण वाढत्या रुग्णसंख्येच्या पार्श्वभूमीवर अतिग्रे येथील संजय घोडावत कॅम्पस येथे ३५० बेड व ९० ऑक्सिजन बेडचे रुग्णालय सुरू केले आहेत. त्यामुळे रुग्णांवर तातडीने योग्य उपचार होण्यास मदत होणार आहे. सेवाक्षेत्रात कार्यरत लोकांपासून संसर्ग रोखण्यासाठी मतदार संघात ॲंटिजिन टेस्ट करण्याचे नियोजन केले आहे.