रंकाळा परिसरातील दीड एकर जागा देवस्थानच्या ताब्यात

कोल्हापूर : पश्चिम महाराष्ट्र देवस्थान व्यवस्थापन समितीची शहरातील रंकाळा परिसरातील राज्य उत्पादन शुल्क कार्यालयासमोरील पिवळ्या पट्ट्यातील ५९ गुंठे (दीड एकर) जागा समितीने गुरुवारी ताब्यात घेतली. ही जमीन अनेक वर्ष शेतकऱ्यांना कसण्यासाठी दिली होती. आता तिथे दोनशे बेडचे सुसज्ज भक्त निवास बांधण्यात येणार आहे.

देवस्थान समितीच्या हजारो एकर जमिनी असून, त्यापैकी अनेक जमिनींवर अतिक्रमण झाले आहे, काही जमिनींच्या वापरासंबंधी शर्तभंग झाला आहे. रंकाळ्याजवळील ही जागा अनेक वर्षे एका शेतकऱ्याला कसण्यासाठी दिली होती. समितीने या जागेचा ताबा देवस्थानकडे परत देण्याची मागणी केली होती. मात्र, संबंधितांनी ताबा देण्यास नकार दिला, त्यामुळे तत्कालीन अध्यक्ष महेश जाधव यांच्या काळात कायदेशीर प्रक्रिया सुरू करण्यात आली. त्यासाठी जिल्हाधिकारी, प्रांत, तहसीलदार यांच्याकडे पाठपुरावा करण्यात आला होता. त्याविरोधात शेतकऱ्याने न्यायालयात याचिका दाखल केली, मात्र न्यायालयाने यावर स्थगिती आणण्यास नकार दिला. अखेर गुरुवारी तहसीलदार, मंडल अधिकारी, तलाठी यांनी जागा रितसर पश्चिम महाराष्ट्र देवस्थान समितीच्या ताब्यात दिली. त्याची कागदपत्रे सचिव विजय पोवार यांच्याकडे सुपूर्द करण्यात आली. यावेळी विशेष प्रकल्प अभियंता सुदेश देशपांडे, उपअभियंता सुयश पाटील, लिपिक मिलिंद घेवारी, मंडल अधिकारी व देवस्थान समितीचे कर्मचारी उपस्थित होते.

--

फोटो नं २९०७२०२१-कोल-देवस्थान

ओळ : कोल्हापुरातील रंकाळा परिसरातील दीड एकर जागा पश्चिम महाराष्ट्र देवस्थान समितीने गुरुवारी ताब्यात घेतली. सचिव विजय पोवार यांच्याकडे जमिनीची कागदपत्रं सुपूर्द करण्यात आली.

----