कन्नडच्या दुराभिमानाबद्दल नव्हे, तर मराठीला डावलल्याबद्दल सत्कार

कन्नड संघटनेच्या नेत्यांनी आज बेळगावातील गणेश विसर्जन मिरवणुकीदरम्यान मनोपाच्या व्यासपीठावर फक्त कन्नड बॅनर लावणाऱ्या अधिकाऱ्यांचा सत्कार केला.

यावेळी मनपा आयुक्त रुद्रेश घाळी यांनी कन्नड भाषेचा बॅनर व्यासपीठावर लावण्यासाठी कष्ट घेतले होते. गणेश विसर्जनाच्यावेळी कपिलेश्वरच्या तलावाशेजारी हा बॅनर बांधला होता. अनावरण केलेल्या बॅनरचा विरोध करणाऱ्या कार्यकर्त्यांना लक्ष्मी निप्पानीकर या महिला अधिकाऱ्यांनी धारेवर धरले. याबद्दल स्वतःला कन्नड सेनानी म्हणून घेणाऱ्या अशोक चंदरंगी या कन्नड नेत्याने त्यांचा सत्कार केला. कन्नड सक्ती करण्याच्या या प्रयत्नाबद्दल अधिकाऱ्यांचे विशेष कौतुक करण्यात आले.

दीपक गुडगणत्ती, महादेव थलवरा यांच्यासह इतर कन्नड संघटनांचे नेते यावेळी उपस्थित होते. एकीकडे सीमाभागात मराठी भाषिकांना आम्ही सन्मानाचे जगणे देतो असे सांगण्यात येत असताना आता कन्नड संघटना, त्यांचे अधिकारी यांचा खरा चेहरा या पद्धतीने उघड होऊ लागला आहे.

मराठी भाषिकांना दुय्यम वागणूक देत मराठी लोकांना बघून घेतोची भाषा करणाऱ्या अधिकाऱ्याचा कानडी सत्कार झाला. यावरून सीमाभागातील बदलणाऱ्या परिस्थितीची जाणीव लोकांना होऊदे. बेळगाव महापालिका निवडणुकीत समितीला कटकारस्थान करून पराभूत करण्यात आले आहे. महाराष्ट्र सरकार याकडे गांभीर्याने बघणार का ? सीमाभागातील मराठी जनतेने आता सावध होत सिंहगर्जना करणे गरजेचे आहे.

फोटो : बेळगावात मनपा अभियंत्याचा सत्कार करताना कानडी संघटना.