निराधार सुनीताला मिळाला संजय गांधी योजनेचा आधार

उचगाव:

कोविड-१९ काळात ओढावलेल्या आपत्तीत तिच्या पतीचं निधन झालं. पतीच्या मृत्यूनंतर दोन मुलांचा व वयोवृद्ध सासू -सासऱ्याची जबाबदारी तिच्या खांद्यावर आली. गरिबीचे चटके सहन करत असताना कोल्हापूर दक्षिण मतदारसंघाचे संजय गांधी निराधार योजनेचे संतोष कांबळे (गडमूडशिंगी ) व युवा ग्रामीण विकास संस्थेचे सामाजिक कार्यकर्ते मोहन सातपुते यांनी निराधार योजनेतून तिला विशेष साह्य मिळावे म्हणून प्रयत्न केले आणि पालकमंत्री सतेज पाटील व आमदार ऋतुराज पाटील यांच्या प्रयत्नामुळे तिला संजय गांधी निराधार योजनेतून अर्थसाह्य मिळाल्याचे नुकतेच पत्र सुनीता शरद गवळी रा.महालक्ष्मीनगर ,उजळाईवाडी यांना प्रदान करण्यात आले.

पालकमंत्री सतेज पाटील,आ.ऋतुराज पाटील व प्रतिमा सतेज पाटील यांच्या पुढाकाराने कोल्हापूर दक्षिण मतदारसंघातील ३६ गावात सामाजिक कार्यकर्ते संतोष कांबळे तळमळीने संजय गांधी निराधार योजनेवर काम करत आहेत. त्यांनी अनेक निराधार,विधवा,दिव्यांग,विशेष घटकाला न्याय मिळवून दिला आहे. त्यांच्या समाजकार्यामुळे अनेकांना आयुष्यभराचा आधार मिळाला आहे.

विशेष म्हणजे निराधाराचा ते आधार बनले आहेत. तहसीलदार कार्यालयात वयोवृद्ध नागरिकांना हयातीचे व उत्पन्नाचे दाखले जमा करावे लागत होते.तर जिल्हा शल्यचिकित्सक यांच्याकडेही जावे लागत होते. कोविड संसर्गजन्य परिस्थितीत वृद्धांना त्रास नको म्हणून त्यांनी जिल्हाधिकारी यांना निवेदन देऊन तलाठी कार्यालयातच दाखले जमा करावेत अशी मागणी केली आणि आता हे दाखले तलाठी कार्यालयात जमा होत असल्याने वयोवृद्धाचा त्रास कमी झाला आहे.

शासनाच्या विविध घटकांसाठी असलेल्या योजनांविषयी मार्गदर्शन करून त्यांना विशेष योजनांचा विनामोबदला लाभ मिळवून देणाऱ्या संतोष कांबळे यांच्या तळमळीला सलाम करावाच लागेल

फोटो : निराधार सुनीता शरद गवळी यांना संजय गांधी निराधार योजनेतून पेन्शन योजना मजूर झाल्याचे पत्र देताना संजय गांधी निराधार योजनेचे सदस्य संतोष कांबळे.