‘राष्ट्रवादी’च्या सुंदराबाई बिलावर विरोधकांच्या ‘छावणीत’?

गडहिंग्लज पालिकेत सत्ताधारी राष्ट्रवादीचे नऊ, तर विरोधी जनता दल-जनसुराज्य आघाडीचे आठ नगरसेवक आहेत. ठरवून दिलेली मुदत संपल्याने मावळत्या नगराध्यक्षा लक्ष्मी घुगरे यांनी राजीनामा दिला.

गडहिंग्लज : नगराध्यक्ष पदाची पहिली संधी आपल्यालाच मिळावी या मागणीवर अरुणा शिंदे व सरिता गुरव या दोन्हीही माघारीच्या दिवसापर्यंत ठाम राहिल्यामुळे ‘राष्ट्रवादी’त निर्माण झालेला तिढा ‘गुरव’ यांच्या माघारीने सुटला. मात्र, त्यानंतर सुंदराबाई बिलावर या विरोधी आघाडीच्या छावणीत सामील झाल्याची चर्चा आहे. तसे झाल्यास काठावरील बहुमताची राष्ट्रवादीची सत्ता संपुष्टात येऊन सत्तांतराची शक्यता आहे. त्यामुळे गडहिंग्लजसह जिल्ह्यात खळबळ उडाली आहे.
गडहिंग्लज पालिकेत सत्ताधारी राष्ट्रवादीचे नऊ, तर विरोधी जनता दल-जनसुराज्य आघाडीचे आठ नगरसेवक आहेत. ठरवून दिलेली मुदत संपल्याने मावळत्या नगराध्यक्षा लक्ष्मी घुगरे यांनी राजीनामा दिला. त्यामुळे नगराध्यक्ष निवडीसाठी मंगळवारी सकाळी ११ वा. पालिकेची खास सभा बोलविली आहे. सत्ताधारी व विरोधकांत शह-काटशहाच्या हालचाली सुरू आहेत. दोन्ही आघाडीच्या नगरसेवकांना सहलीवर पाठविण्यात आले आहे.
नगराध्यक्ष पदासाठी राष्ट्रवादीतर्फे अरुणा शिंदे, तर विरोधकांतर्फे जनता दलाचे राजेश बोरगावे रिंगणात आहेत. ‘राष्ट्रवादी’च्या बिलावर विरोधकांमध्ये सामील झाल्या तर सत्ताधारी ‘राष्ट्रवादी’ पालिकेत अल्पमतात येईल. त्यामुळे सत्तांतर होईल. तसे घडल्यास ‘गडहिंग्लज’ची राजकीय समीकरणेच पुन्हा बदलणार आहेत.