खासगी रुग्णालयातील बेड उपलब्धतेची माहिती महापालिका संकलित करणार

कोल्हापूर : कोविड संसर्गाच्या काळात बेड उपलब्ध होत नाही म्हणून होणारा गोंधळ टाळण्यासाठी महानगरपालिका प्रशासन रोज खासगी रुग्णालयातील बेडची माहिती संकलित करणार आहे. त्यासाठी मोठ्या रुग्णालयात तीन पाळ्यांत चोवीस तास कर्मचाऱ्यांची नेमणूक करण्यात आली असून, दोन दिवसांत माहिती संकलनाचे काम सुरू होईल.

जिल्ह्यात सर्वत्र कोविड रुग्णांच्या संखेत वाढ होत आहे. बाहेरच्या जिल्ह्यातील रुग्णसुद्धा कोल्हापुरात उपचाराकरिता दाखल होत आहेत. रुग्णांची संख्या अजूनही वाढण्याची शक्यता गृहीत धरून महानगरपालिका कोविड सेंटर्स सुरू करीत आहे.

गतवर्षी बेड मिळत नाहीत म्हणून रुग्ण व रुग्णांच्या नातेवाइकांमध्ये गोंधळ निर्माण झाला होता. रात्रभर रुग्ण घेऊन वेगवेगळ्या रुग्णालयांत फेऱ्या माराव्या लागत होत्या. काही रुग्णांना बेड मिळाले नाहीत म्हणून त्यांना प्राण गमवावे लागले होते, अशी परिस्थिती पुन्हा निर्माण होऊ नये म्हणून महापालिका प्रशासनाने यावेळी खबरदारी घेतली आहे.

शहरातील सर्वच खासगी रुग्णालयातील बेडची एकूण संख्या, तेथील रुग्णांची संख्या, शिल्लक बेडची संख्या किती आहे याची माहिती महापालिका प्रशासनातर्फे संकलित केली जाणार आहे. त्याकरिता मोठ्या खासगी रुग्णालयात तीन पाळ्यांत कर्मचाऱ्यांची नियुक्ती केली जाणार आहे. रोज ही माहिती संकलित केली जाणार असून, गरजू रुग्णांना ती देण्यात येणार आहे.