मगदूम हायस्कूलमध्ये ‘मी सुद्धा गाडगेबाबा’ उपक्रम

कोल्हापूर : श्री आचार्यरत्न देशभूषण शिक्षक प्रसारक मंडळ संचलित दादासाहेब अ. मगदूम हायस्कूलमध्ये लोकसंत गाडगेबाबा यांच्या जयंतीनिमित्त ‘मी सुद्धा गाडगेबाबा’ हा उपक्रम उत्साहात साजरा करण्यात आला. उपक्रमाची सुरुवात नीळकंठराव लोकरे यांच्या हस्ते गाडगेबाबांच्या प्रतिमेचे पूजन करून झाली. गाडगेबाबांच्या जीवनकार्याचा विस्तृत परिचय सहाय्यक शिक्षिका रंजना माळी यांनी करून दिला.

याप्रसंगी बोलताना प्रमुख पाहुणे नीळकंठराव लोकरे यांनी ‘विद्यार्थ्यांनी स्वयंशिस्त व स्वावलंबन या तत्त्वांचा अंगीकार करत स्वत:च्या व्यक्तिमत्त्वाची वेगळी ओळख निर्माण करावी तसेच गाडगेबाबांचे थोर विचार सर्वांनी आत्मसात करून समाजासाठी आपण काही तरी देणे लागतो याची जाणीव ठेवून वर्तन करावे’ असे प्रतिपादन केले.

‘गाडगेबाबांनी अज्ञान, अस्वच्छता व अंधश्रद्धा यांनी बुरसटलेल्या समाजाचा विकास करण्याचे व्रत हाती घेऊन कीर्तनसारखे प्रभावी माध्यम वापरून समाजहिताचे व समाजसुधारणेचे बहुमोल कार्य केले. त्याप्रमाणे आपल्या हातूनसुद्धा योग्य समाजकार्य घडणे अपेक्षित आहे’ असे प्रतिपादन अध्यक्षस्थानी बोलताना मुख्याध्यापक बसवराज वस्त्रद यांनी केले. ‘मी सुद्धा गाडगेबाबा’ या उपक्रमाअंतर्गत स्वच्छतेबाबत प्रबोधन व जाणीव जागृती करण्यात आली. दररोज स्वत:चे घर, शाळा व परिसर स्वच्छ करण्याचा संकल्प विद्यार्थांनी केला व त्याचे पहिले पाऊल म्हणून शालेय वर्ग व परिसर विद्यार्थांनी श्रमदानातून स्वच्छ केला.

या कार्यक्रमाचे स्वागत व प्रास्ताविक सांस्कृतिक विभागप्रमुख महावीर तेरदाळे व आभार प्रदर्शन दत्ता पालकर यांनी केले. याप्रसंगी विद्यार्थी, शिक्षक व शिक्षकेत्तर कर्मचारी उपस्थित होते.

————————————

फोटो ओळ (23देशमुख हायस्कूल)

लोकसंत गाडगेबाबा यांच्या प्रतिमेचे पूजन करताना नीळकंठराव लोकरे. शेजारी डावीकडून महावीर तेरदाळे, मुख्याध्यापक बसवराज वस्त्रद, नीता लोकरे, रंजना माळी.