‘माऊली’च्या मदतीसाठी समाजाचे अनेक हात पुढे

लोकमत न्यूज नेटवर्क,

कोल्हापूर : रस्त्यावर निराधार होऊन पडलेल्या व काही कारणाने कुटुंबापासून दूर असलेल्या आजी-आजोबांचा एक आधार बनलेल्या संभाजीनगरातील माऊली केअर सेंटरच्या मदतीसाठी समाजातून अनेक मदतीचे हात धावून आले. ‘लोकमत’मध्ये या संदर्भातील वृत्त मंगळवारी प्रसिद्ध झाले होते. त्यामध्ये समाजाच्या दातृत्वाला साद घातली होती.

गेल्या दोन दिवसांत पश्चिम महाराष्ट्र देवस्थान समिती, कर्नाटकातील हेरलेकर कुटुंबीय, कामगारमंत्री हसन मुश्रीफ यांच्या वाढदिवसानिमित्त राष्ट्रवादी युवा काँग्रेसतर्फे, मार्केट यार्डातील व्यापारी बालेचांद बागवान आदींकडून तांदूळ (६५० किलो), ज्वारी (१५० किलो), गहू (१८० किलो), तेल (९० किलो), रवा (१०० किलो), पोहे (११० किलो), गूळ (९० किलो) ,कडधान्य (११० किलो) यासोबत देशातील एका मोठ्या फाउंडेशनने सीएसआर निधी कायमस्वरूपी आर्थिक स्वरूपात मदत देण्याची प्रक्रिया सुरू केली आहे.

मंगल व भाऊ राहुल यांच्या मदतीने दीपक कदम यांनी या सेंटरची ८ जानेवारी २०१४ मध्ये पुईखडी येथे सुरुवात केली. आता संभाजीनगर येथील फ्लॅटमध्ये फिरस्त्या, निराधारांना मोफत व ज्यांना जेवढे पैसे देणे शक्य आहे ,तितके पैसे घेऊन शुश्रूषा करतात. पैसे देऊन आलेल्यांपैकी अनेकांना आता सध्या पैसे देणे शक्य नाही. तरीसुद्धा त्यांनी त्यांना ममत्वेने आसरा दिला आहे. संस्थेत एकूण ४८ आजी-आजोबा आहेत. त्यापैकी २१ जण फिरस्ते निराधार आहेत. त्यांची देखभाल आणि औषध उपचार करण्यासाठी मदतीची गरज आहे. दीपक हे उसनवारी आणि इतरांकडून कर्ज घेऊन हा खर्चाचा भार उचलतात. मागील लॉकडाऊनपासून दात्यांकडून मिळणारी मदत आटली. त्यांना अनंत अडचणींना सामोरे जावे लागत होते. ‘लोकमत’मध्ये बातमी प्रसिद्ध होताच मदतीचा झरा पुन्हा सुरू झाला.