शिवसेना पदाधिकाऱ्यांच्या राजीनाम्याची मंडलिकांवर जबाबदारी

कोल्हापूर : जिल्हा परिषदेतील शिवसेनेच्या पदाधिकारी बदलाचा चेंडू ग्रामविकासमंत्री हसन मुश्रीफ यांनी शिवसेनेच्याच कोर्टात ढकलला आहे. या पार्श्वभूमीवर खासदार संजय मंडलिक यांनी यासाठी पुढाकार घेतला असून, त्यांनी संबंधित पदाधिकाऱ्यांच्या नेत्यांना फोन लावायला सुरुवात केली आहे. याबाबत मंडलिक यांच्याशी संपर्क साधला असता तो होऊ शकला नाही.

जिल्हा परिषदेतील पदाधिकारी बदलाची गेले चार महिने चर्चा सुरू आहे. आज, उद्या राजीनामे होणार म्हणत म्हणत जानेवारीपासून मे महिना उजाडला आहे. मात्र, मुश्रीफ यांनी शुक्रवारी पत्रकार परिषदेमध्ये शिवसेनेचे तीन पदाधिकारी असल्यामुळे त्यांनी आधी राजीनामे देण्याची गरज असल्याचे स्पष्ट केले होते.

बांधकाम सभापती हंबीरराव पाटील हे माजी आमदार सत्याजित पाटील सरूडकर यांचे समर्थक आहेत. ‘गोकुळ’च्या निवडणुकीत सरूडकर यांनी पालकमंत्री पाटील व मुश्रीफ यांच्या विरोधात भूमिका घेतली होती. मात्र, त्यांनी याआधी आपली भूमिका स्पष्ट करताना जेव्हा शिवसेना नेत्यांची बैठक होईल, त्यावेळी काय तो निर्णय घेतला जाईल, असे स्पष्ट केले होते. शनिवारी पुन्हा त्यांच्याशी संपर्क साधला असता त्यांनी फोन उचलला नाही.

समाजकल्याण समिती सभापती स्वाती सासने या माजी आमदार उल्हास पाटील यांच्या समर्थक आहेत. राजीनाम्याबाबत पाटील यांच्याशी संपर्क साधला असता ते म्हणाले, अजून माझ्याशी कुणीही संपर्क साधलेला नाही. मात्र, निरोप आला तर सर्वजण एकत्र बसून निर्णय घेऊ.

चौकट

मंडलिक यांचा मिणचेकर यांना फोन

शिक्षण सभापती प्रवीण यादव हे माजी आमदार सुजित मिणचेकर यांचे समर्थक आहेत. यादव यांच्या राजीनाम्याबाबत मिणचेकर यांच्याशी संपर्क साधला असता ते म्हणाले, खासदार संजय मंडलिक यांनी राजीनामा देण्याबाबत फोन केला होता. आपण बैठक बोलवा. त्यावेळी बसून निर्णय घेऊ, असे मी त्यांना सांगितल्याचे डॉ. मिणचेकर यांनी सांगितले.

चौकट

आधी सभापती, मग इतरांचे राजीनामे

जिल्हा परिषदेत शिवसेनेचे तीन सभापती असून स्वाभिमानी शेतकरी संघटनेकडे एक सभापती पद आहे. सुरुवातीला या चौघांनी अध्यक्षांकडे राजीनामे द्यावे लागतात. त्यानंतर ते मंजूर झाल्यानंतर अध्यक्ष, उपाध्यक्ष यांचे राजीनामे होतात. अध्यक्ष यांनी जिल्हाधिकारी यांच्याकडे राजीनामा देणे बंधनकारक आहे. यामुळे जोपर्यंत चार सभापतींचे राजीनामे मंजूर होत नाहीत, तोपर्यंत पदाधिकारी बदल मोहिमेला वेग येणार नाही हे निश्चित.

चौकट

मंडलिक, नरके, आबिटकरांच्या कार्यकर्त्यांना संधी

या पदाधिकारी बदलानंतर खासदार मंडलिक, आमदार प्रकाश आबिटकर, माजी आमदार चंद्रदीप नरके यांच्या कार्यकर्त्यांना संधी मिळणार आहे. शिवसेनेचे तीनही पदाधिकारी हे खासदार धैर्यशील माने यांच्या मतदारसंघातील असल्याने पदाधिकारी बदलापेक्षा कोरोना हटवणे महत्त्वाचे आहे, अशी भूमिका माने यांनी घेतली होती. असे असले तरी बदलासाठी मंडलिक,आबिटकर, नरके आग्रही राहणार आहेत हे निश्चित.