महागणपतीचे ऑनलाईन दर्शन

कोल्हापूर : कोल्हापुरातील शिवाजी चौक तरुण मंडळाच्या महागणपतीची प्रतिष्ठापना मार्केट यार्ड येथील शाहू सांस्कृतिक हॉलमध्ये करण्यात आली आहे. शासनाने कोरोनाच्या पार्श्वभूमीवर घालून दिलेल्या निर्बंधानुसार गेल्यावर्षीपासून मंडळाने हा निर्णय घेतला आहे.

शिवाजी चौकात दरवर्षी २१ फुटी महागणपतीची प्रतिष्ठापना केली जाते. यंदा मात्र शासकीय नियमानुसार एकवीस इंचाच्या गणेशमूर्तीची प्रतिष्ठापना करण्यात आली, तर २१ फुटी महागणपतीची मूर्ती मार्केट यार्ड येथे बसवण्यात आली. सायंकाळी एकवीस इंचाच्या मूर्तीचे आगमन पालखीतून झाले. २१ फुटी महागणपतीचे ऑनलाईन दर्शन छत्रपती शिवाजी चौक येथे थ्रीडी स्क्रीनद्वारे करण्यात येणार आहे, अशी माहिती उत्सव कमिटी अध्यक्ष प्रसाद वळंजू यांनी दिली. कोरोनाच्या पार्श्वभूमीवर मंडळाच्यावतीने जनजागृती करण्यात येणार असून, मोफत सॅनिटायझर वाटप तसेच प्रत्येक भक्ताला मास्क वाटप, त्यांची थर्मल तपासणी करून आवश्यक ती काळजी मंडळाच्यावतीने घेण्यात येणार असल्याचे मंडळाचे उपाध्यक्ष सुहास भेंडे यांनी सांगितले.

--