कोल्हापुरात होणाऱ्या पहिल्या विश्वात्मक संत साहित्य संमेलनाध्यक्षपदी मदन गोसावी

लोककलेचे ज्येष्ठ अभ्यासक डाॅ. प्रकाश खांडगे यांच्या अध्यक्षतेखाली कोल्हापुरात शनिवारी (दि. १८) संमेलनाध्यक्ष निवडीची प्रक्रिया पार पडली. यावेळी पंतप्रधान कार्यालयातील उपसचिव डाॅ. विनय देव, वनविभागातील पुणे विभागाचे प्रमुख रंगनाथ नाईकडे, गोपीचंद कदम, राज्य न्यायाधीश संघटनेचे अध्यक्ष दिलीप घुमरे, धनर्वी कुलकर्णी, रमेश शिंदे, कोल्हापूर वारकरी संघाचे अध्यक्ष शिवाजीराव वागवेकर, बापूसाहेब किल्लेदार, बाळकृष्ण महाराज गिरी, दत्तात्रय साठे, आदी उपस्थित होते. या संमेलनात जगभरातील संत साहित्याचे अभ्यासक, उपासक उपस्थित राहणार असल्याचे डाॅ. खांडगे आणि बाबा पाटील यांनी सांगितले. या संमेलनाची तारीख आणि ठिकाण लवकरच निश्चित केले जाणार आहे. कोरोना काळातही ‘संत साहित्याने दिलेली मनःशक्ती’ याविषयी विशेष परिसंवाद या संमेलनात होणार असल्याचे रंगनाथ नाईकडे यांनी सांगितले. संत साहित्याची संशोधन केंद्र जगभर सुरू व्हावीत, यासाठी विशेष कृतीयोजना आखणार असल्याचे विनय देव यांनी सांगितले.

मदन गोसावी यांची ओळख

मदन महाराज गोसावी यांचा जन्म सातारा जिल्ह्यातील नायकाची वाडी येथे झाला. अत्यंत प्रतिकूल परिस्थितीत विधी शाखेतून त्यांचे शिक्षण झाले. त्यांनी महाराष्ट्रात अनेक ठिकाणी न्यायाधीश पदावर काम केले. मंत्रालयात विधी व न्याय खात्याचे सहसचिवपदी काम केले आहे. सध्या अहमदाबाद येथे राष्ट्रीय कंपनी लवादाचे सदस्य म्हणून ते कार्यरत आहे. उच्चपदस्थ अधिकारी असूनही महाराष्ट्रभर त्यांनी कीर्तन प्रवचनांतून जनजागृतीचे काम केले आहे. कायदेविषयक शिबिरांचे आयोजन, संतांच्या ग्रंथांचे वाचन व्हावे म्हणून त्यांनी गावोगावी ज्ञानेश्वरी व गाथा अभ्यासवर्ग सुरू केले आहेत.

फोटो (२४०९२०२१-कोल-मदन गोसावी (महाराज)