दापोलीत आजपासून साहित्य संमेलन

‘माता रमाई’ साहित्यनगरी : अरूणा ढेरे, नितीन देसाई, सुबोध भावे उपस्थित राहणार

शिवाजी गोरे -दापोली महाराष्ट्र साहित्य परिषदेच्या २३व्या विभागीय मराठी साहित्य संमेलनाचे उद्घाटन उद्या (दि. १९) कलादिग्दर्शक नितीन चंद्रकांत देसाई यांच्या हस्ते दापोलीत होणार आहे. प्रख्यात साहित्यिक डॉ. अरूणा ढेरे या संमेलनाच्या अध्यक्ष असून, उद्घाटन कार्यक्रमाला वन व पर्यावरणमंत्री रामदास कदम उपस्थित राहणार आहेत. डॉ. बाळासाहेब सावंत कोकण कृषी विद्यापीठाच्या सर विश्वेश्वरय्या सभागृहात शुक्रवारी सकाळी ११ वाजता या संमेलनाचे उद्घाटन होणार असून, दोन दिवस भरगच्च कार्यक्रम होणार आहेत.
संमेलनाच्या उद्घाटनापूर्वी निघणाऱ्या साहित्यदिंडी व चित्ररथामध्ये अभिनेता सुबोध भावे, शर्वरी जमेनिस, गायक प्रथमेश लघाटे, शमिका भिडे सहभागी होणार आहेत. या संमेलनाचे यजमानपद असलेल्या मसापच्या दापोली शाखेकडून यानिमित्त उद्योजक, साहित्यिक, पत्रकार, सहकारतज्ज्ञ आदींचा विशेष पुरस्कार देऊन गौरव केला जाणार आहे. संमेलनाच्या पहिल्या दिवशी पितांबरी उद्योग समुहाचे रवींद्र प्रभूदेसाई, जिल्हा मध्यवर्ती बँकेचे अध्यक्ष डॉ. तानाजीराव चोरगे, ज्येष्ठ कला दिग्दर्शक चंद्रशेखर बगाडे, सुहासिनी गायकवाड आदी मान्यवरांचा विशेष गौरव होणार आहे, तर समारोपाच्या दिवशी जिल्ह्यातील पहिल्या दैनिकाच्या संपादिका धनश्री पालांडे, उद्योजक रघुनाथ महाडिक, प्रा. शांताबाई सहस्रबुद्धे यांचा मान्यवरांच्या हस्ते गौरव केला जाणार आहे.
संमेलनाच्या पहिल्या दिवशी ‘साहित्यात कोकणचे योगदान व सद्यस्थिती’ या विषयावरील परिसंवाद, प्रख्यात गीतकार-अभिनेते किशोर कदम यांची मुलाखत, निमंत्रितांचे काव्यसंमेलन होणार आहे. सायंकाळच्या सत्रात विसुभाऊ बापट यांचा कुटुंब रंगलय काव्यात हा प्रयोग तसेच नंदेश उमप आणि युवराज मोहिते यांचा ‘आमचा बाप आणि आम्ही’ हा कार्यक्रम होणार आहे.
शनिवारी बदलती माध्यमे आणि त्यातील वाचक, प्रेक्षक व श्रोत्यांचे स्थान या विषयावर परिसंवाद होणार आहे. प्रसिद्ध अभिनेते राहुल सोलापूरकर यांची मुलाखत, दीपक देशपांडे यांचा ‘हास्यकल्लोळ’ हे कार्यक्रम होणार आहेत. सायंकाळच्या सत्रात निमंत्रितांचे कवी संमेलन, समारोपात मान्यवरांचा सत्कार होणार आहे. भीमराव पांचाळे यांच्या गझल गायनाने संमेलनाची सांगता होणार आहे. (प्रतिनिधी)