पक्षीय झेंडा बाजूला ठेवून मराठा आरक्षणासाठी लढूया

कोल्हापूर : पक्षीय झेंडा बाजूला ठेवून मराठा आरक्षणाच्या लढ्यामध्ये सहभागी व्हा, असे आवाहन भाजपचे ग्रामीण जिल्हाध्यक्ष समरजित घाटगे यांनी केले. घाटगे यांनी शुक्रवारी (दि. २१) याबाबत जिल्ह्यातील भाजपचे पदाधिकारी आणि नेत्यांशी ऑनलाईन बैठकीत चर्चा केली. त्यावेळी त्यांनी हे आवाहन केले.

घाटगे म्हणाले, लवकरच मराठा आरक्षणासंबंधी आंदोलनाची रूपरेषा स्पष्ट केली जाईल. यावेळी पक्ष, गट-तट सर्व काही सोडून एक मराठा म्हणून आता सर्वांनी एकत्र येत हा लढा पुन्हा एकदा उभा करणे आवश्यक आहे. या लढ्याची सुरुवात राजर्षी शाहू महाराजांच्या कोल्हापुरातूनच करण्याबद्दल मी आवाहन करतो. प्रत्येक मराठा युवक-युवतीने आता पुढाकार घेऊन या आंदोलनाचे नेतृत्व केले पाहिजे. आता एक मराठा म्हणून हा विषय तडीस नेल्याशिवाय मी शांत बसणार नाही.

या चर्चेत माजी खासदार धनंजय महाडिक, माजी आमदार सुरेश हाळवणकर, पश्चिम महाराष्ट्र समन्वयक मकरंद देशपांडे, देवस्थान समितीचे माजी अध्यक्ष महेश जाधव, शहर जिल्हाध्यक्ष राहुल चिकोडे, जिल्हा परिषदेच्या माजी अध्यक्षा शौमिका महाडिक, नाथाजी पाटील, विठ्ठल पाटील, मिलिंद भिडे, शिवाजी माने व इतर पदाधिकारी या चर्चेत सहभागी झाले होते.

२२०५२०२१ कोल समरजित घाटगे