सर्फनाला प्रकल्पासाठी दोन गावांचे भूसंपादन

कोल्हापूर : आजरा तालुक्यातील सर्फनाला प्रकल्पासाठी पारपोली व गावठाण या दोन गावांची संयुक्त मोजणी करून नवीन भूसंपादन कायद्यानुसार जमिनीचे संपादन करावे, नागणवाडी प्रकल्पासाठी स्वेच्छा पुनर्वसन केलेल्या नागरिकांना अत्यंत कमी अनुदान मिळाले असून, त्यांच्यासाठी पॅकेजच्या निम्म्या रकमेसह सानुग्रह अनुदानाचा प्रस्ताव मंजूर करण्यात यावा, असा निर्णय सोमवारी झालेल्या बैठकीत घेण्यात आला. यावेळी जलसंपदा मंत्री जयंत पाटील यांनी नागणवाडी, आंबेओहळ सर्फनाला आणि धामणी प्रकल्पग्रस्तांना न्याय दिला जाईल, अशी ग्वाही जलसंपदा मंत्री जयंत पाटील यांनी दिली.

मंत्री जयंत पाटील यांच्या अध्यक्षतेखाली जिल्हाधिकारी कार्यालयात राधानगरी, कागल तसेच आजरा विभागातील लघू-मध्यम प्रकल्पांची आढावा बैठक घेण्यात आला. यावेळी ग्रामविकास मंत्री हसन मुश्रीफ, आरोग्य राज्यमंत्री राजेंद्र पाटील-यड्रावकर, खासदार संजय मंडलीक, आमदार राजेश पाटील, आमदार प्रकाश आबिटकर, जिल्हाधिकारी दौलत देसाई, अपर जिल्हाधिकारी किशोर पवार, जिल्हा पुर्नवसन अधिकारी अश्विनी जिरंगे, विजय देवणे उपस्थित होते.

मंत्री हसन मुश्रीफ यांनी प्रकल्पग्रस्तांच्या आर्थिक मोबदल्याचा प्रश्न प्रशासनाने लवकरात लवकर निकाली काढावा. यात जिल्हाधिकाऱ्यांनी लक्ष घालावे, अशी सूचना केली. जिल्हाधिकारी दौलत देसाई यांनी नागणवाडीतील ८० टक्के प्रकल्पग्रस्तांना जमीन देण्यात आली आहे. स्वेच्छा पुनर्वसन केलेल्या २० टक्के लोकांना नवीन पॅकेजच्या निम्मी रक्कम तरी मिळावी, त्यांना सानुग्रह अनुदान मिळावे याचा प्रस्ताव मंजुरीसाठी पाठवण्यात आल्याचे सांगितले.

मोबदला मिळाला तरच मोजणीस विरोध नाही..

प्रकल्पग्रस्तांच्या वतीने धनाजी गुरव, संपत देसाई, संजय तरडेकर, अशोक जाधव यांनी मत मांडले. या वेळी त्यांनी प्रशासनाने जमिनीसह जे-जे अस्तित्वात आहे त्या सर्वांची मोजणी नियमाप्रमाणे करावे आणि त्याचा योग्य तो मोबदला ग्रामस्थांना मिळाला तर ग्रामस्थांचा (प्रकल्पग्रस्तांचा) मोजणीला विरोध नसल्याचे स्पष्ट केले.

बुधवारपासून मोजणी..

प्रांताधिकारी संपत खिलारी यांनी प्रकल्प बाधितासंदर्भातील आवश्यक ती मोजणी पावसाळ्यापूर्वी संपविण्यात येईल. त्यासाठी प्रत्यक्ष सुरुवात येत्या बुधवारी करण्यात येईल अशी माहिती प्रांताधिकारी संपत खिलारी यांनी दिली.

-

फोटो नं ३१०५२०२१-कोल-प्रकल्पग्रस्त

ओळ : कोल्हापुरातील जिल्हाधिकारी कार्यालयात सोमवारी जलसंपदा मंत्री जयंत पाटील यांच्या अध्यक्षतेखाली प्रकल्पग्रस्तांच्या पुनर्वसनाची बैठक झाली. यावेळी आमदार प्रकाश आबिटकर, ग्रामविकास मत्री हसन मुश्रीफ, खासदार संजय मंडलिक, जिल्हाधिकारी दौलत देसाई, आमदार राजेश पाटील, अप्पर जिल्हाधिकारी किशोर पवार यांच्यासह अधिकारी उपस्थित होते.

--

-