रेमडेसिविर इंजेक्शनचा ‘आयसाेलेशन’कडे तुटवडा

कोल्हापूर : कोल्हापूर महानगरपालिका क्षेत्रातील कोविड- १९ रुग्णांवर उपचार करण्यासाठी महानगरपालिका प्रशासनाने गेल्या वर्षभरात चांगल्या पायाभूत आरोग्य सुविधा निर्माण केल्या ; परंतु गंभीर रुग्णांना द्याव्या लागणाऱ्या रेमडेसिविर इंजेक्शनचा पुरवठाच होत नसल्यामुळे आरोग्य प्रशासन आणि रुग्णांच्या नातेवाइकांची चांगलीच धावपळ उडत आहे.

गतवर्षी कोल्हापूर जिल्ह्याच्या ग्रामीण भागापेक्षा कोल्हापूर शहरात सर्वाधिक कोविड रुग्ण आढळून आले. त्यात अनेकांना आपला जीव गमवावा लागला होता. कोविड विषाणूवर नेमके औषध नसल्याने गंभीर तसेच अत्यवस्थ रुग्णांना रेमडेसिविर इंजेक्शन देण्यास सुरुवात झाली. एका रुग्णाला सहा इंजेक्शन दिली जातात. त्याची किंमतही जास्त असल्यामुळे सर्वसामान्य रुग्णांना ती घेणे अशक्य होत आहे. रुग्णसंख्या जशी वाढेल तसा या इंजेक्शनचा काळाबाजार सुरू झाल्याने तर सर्वसामान्य जास्तच हैराण झाले.

त्यातून मार्ग काढत टास्क फोर्सच्या सूचनेनुसार राज्य सरकार स्वत: पुढाकार घेऊन हे इंजेक्शन मोफत देऊ लागले. सुरुवातीला ती मिळाली; परंतु आता राज्यभरात कोविड रुग्णांचा विस्फोट झाल्याने रेमडेसिविर मिळण्यात अडचणी आल्या आहेत. रुग्णांच्या नातेवाइकांची अडवणूक व त्यातून पुढे आर्थिक लुबाडणूक करणे सुरू झाले आहे. त्यामुळे रोगापेक्षा इलाज भयंकर झाला आहे.

खुल्या बाजारात या इंजेक्शनचा तुटवडा आजही आहे. कोल्हापूर महानगरपालिकेच्या आयसोलेशन रुग्णालयात हे इंजेक्शन आवश्यक असलेल्या रुग्णांना मोफत दिले जाते; पण मागणीपेक्षा पुरवठा फारच कमी असल्याने तेथे उपचार करताना अडचणी येत आहेत. रुग्णालयातील कर्मचाऱ्यांसह रुग्णांचे नातेवाईकही वैतागले आहेत.

रेमडेसिविर इंजेक्शनच्या मागणीच्या तुलनेत वीस ते पंचवीस टक्केच पुरवठा होत आहे. जिल्हा शल्यचिकित्सक, जिल्हा आरोग्य अधिकारी यांच्याकडे मागणी नोंदविण्यात आली आहे; परंतु ही मागणी अद्यापही पूर्ण झालेली नाही. कधी इंजेक्शन मिळणार याचीही नेमकी माहिती कोणाला नाही. रुग्णांच्या नातेवाइकांना ती बाहेरून आणण्यास सांगितले जात आहे.

१. रेमडेसिविरची मागणी व पुरवठा-

(दि. १ एप्रिल २०२० ते ३१ मार्च २०२१ पर्यंत)

मागणी केली - ३००० व्हाइल्स

पुरवठा झाला - ६८० व्हाइल्स२.

( दि. १ एप्रिल २०२१ ते ३१ मार्च २०२२ साठी)

- मागणी- ४००० व्हाइल्स,

- आतापर्यंत पुरवठा केवळ - ४२