कुरुंदवाडमध्ये युवकांनीच पेटविला कचरा

कुरुंदवाड : येथील गोठणपूर भागात कचऱ्याचा ढीग साचूनही ठेकेदाराकडून कचरा उठाव न झाल्याने कचरा कुजून परिसरात दुर्गंधी पसरली होती. येथील नागरिकांनी पालिकेकडे वारंवार तक्रार करूनही दखल घेतली जात नसल्याने परिसरातील तरुणांनीच पुढाकार घेऊन कचऱ्याची विल्हेवाट लावत परिसर स्वच्छ केला.

दरम्यान, नगरपालिकेने शहर स्वच्छतेसाठी ठेकेदाराला १ कोटी ८० लाखांचा ठेका देऊनही स्वच्छतेबाबत ठेकेदाराने दुर्लक्ष केल्याने नागरिकांतून तीव्र संताप व्यक्त होत आहे. पालिका प्रशासन आणि लोकप्रतिनिधींनी या प्रश्नांकडे लक्ष घालून ठेकेदारावर अंकुश ठेवण्याची मागणी होत आहे.

पालिकेने शहराच्या स्वच्छतेसाठी पुणे येथील भाग्यदीप एंटरप्रायजेस या कंपनीला १ कोटी ८० लाखाला ठेका देण्यात आला आहे. ठेका देताना आर्थिक वाटणीवरून चांगलेच वादळ चर्चेत आले होते. मात्र, ठेकेदाराकडून स्वच्छतेचे काम वेळेवर होत नसल्याची तक्रार नागरिकांतून वारंवार केली जात आहे.

येथील गोठणपूर पूर्व भागात मोकळी जागा आहे. या जागेत भागातील कचरा संकलन करून या ठिकाणी कचरा टाकला जातो. मात्र, वेळेवर कचरा उचलून घनकचरा व्यवस्थापन ठिकाणी न नेल्यामुळे कचरा कुजून परिसरात दुर्गंधी पसरली आहे. नगरपालिकेकडे कचरा उचलण्यासाठी तक्रार करूनही दखल घेतली नसल्याने परिसरातील तरुणांनी एकत्र येऊन स्वच्छता करत कचरा जाळून त्याची विल्हेवाट लावली.

स्वच्छता ठेकेदाराला पावणेदोन कोटी रुपयांचा ठेका देऊनही कामात हलगर्जीपणा करीत असल्याने नागरिकांतून तीव्र संताप व्यक्त होत असून लोकप्रतिनिधींनी ठेकेदारावर कारवाई करून अंकुश ठेवावा अशी मागणी होत आहे. स्वच्छता मोहिमेत सचिन गायकवाड, रोहित सनदी, रवी माने, संदीप गायकवाड, दादा सावगावे आदींनी पुढाकार घेतला होता.

फोटो - २२०४२०२१-जेएवाय-०५

फोटो ओळ - कुरुंदवाड येथील गोठणपूर भागातील स्वच्छता करून तरुणांनी कचरा पेटवून दिला.