कोल्हापूरच्या ‘अनिकेत’ची सव्वादोन कोटींची भरारी

कोल्हापूर : भारतीय फुटबॉलचे आयडॉल सुनील छेत्री, बायचुंग भुतिया, ग्रे हुपर, अदम लिफोंड्रे, इद्रीसा सियाल, इस्मार अशा दिग्गज फुटबाॅलपटूंनी अमुक एका संघासाठी कोट्यवधी रुपयांच्या पॅकेजवर करारबद्द झाल्याचे आपण वाचले आहे. याच रांगेत आता कोल्हापूरचा युवा फुटबाॅलपटू अनिकेत जाधवही जाऊन बसला आहे. बुधवारी हैदराबाद एफसी संघाकडून तीन वर्षांकरिता खेळण्यासाठी तब्बल २ कोटी २५ लाखांच्या करारावर त्याने स्वाक्षरी केली. इतक्या मोठ्या रकमेचा करारबद्ध होणारा तो पहिला महाराष्ट्रीयन फुटबाॅलपटू ठरला आहे.

अनिकेतने फुटबाॅलचे सुरुवातीचे धडे क्रीडा प्रबोधनीमधून गिरविले. त्याच्या खेळाची चुणूक पाहून प्रथम पुणे एफसी अकॅडमीतून तीन वर्षांसाठी निवड झाली. अनेक वयोगटांत खेळल्यानंतर २०१५ ला त्याची भारतात होणाऱ्या १७ वर्षांखालील फिफा युवा विश्वचषक स्पर्धेसाठीच्या शिबिरासाठी निवड झाली. त्यातून त्याची भारतीय युवा संघात निवड झाली. तो भारतीय संघाचा मुख्य आधार बनला होता. युवा विश्वचषकानंतर त्याची वर्णी भारतीय फुटबाॅल संघाच्या ॲरोजकडून झाली. तेथेही त्याने कौशल्य दाखवले. याच कामगिरीवर त्याची जमशेदपूर एफसी संघात निवड झाली. आयलीग आणि त्यानंतर आयएसएलमध्ये प्र‌‌वेश केला. त्याने त्या हंगामात २७ सामन्यांत गोल करून चुणूक दाखविली. यादरम्यान ब्लॅकबर्न रोव्हर्समध्ये त्याला तीन महिन्यांचे व्यावसायिक प्रशिक्षणही लाभले. त्यात त्याच्या कौशल्याचा गौरव करण्यात आला. या सर्व कामगिरीची दखल घेत हैदराबाद एफसी संघाने त्याला बुधवारी तीन वर्षांकरिता करारबद्ध केले.

कोट

एचएफसी संघातील अनिकेतच्या समावेशामुळे त्याच्या अष्टपैलूपणासह संघातील स्पर्धा वाढेल. तरुण खेळाडूंनी, विशेषत: फाॅरवर्डनी नियमित खेळण्याची गरज आहे. त्यांच्याकडून संघाला मोठ्या अपेक्षा आहेत.

मानोलो मार्केझ,

मुख्य प्रशिक्षक, हैदराबाद एफसी

प्रतिक्रिया

मी हैदराबाद एफसीकडून खेळण्यासाठी अधीर झालो आहे. मी क्लबमध्ये उत्साहवर्धक पथक आणि प्रशिक्षक कर्मचाऱ्यांसोबत काम करण्याची अपेक्षा करीत आहे. या संघाकडून करारबद्ध होताना मला आनंद होत आहे.

- अनिकेत जाधव, युवा फुटबाॅलपटू

फोटो : २१०७२०२१-कोल-अनिकेत जाधव