कोल्हापूर : दारूला उसणे पैसे दिले नसल्याच्या रागातून एका तरुणाने रिक्षा चालकावर लोखंडी रॉडने खुनी हल्ला केला. धनाजी वसंतराव साळुंखे (वय ४० रा. देवकर पानंद, कोल्हापूर) असे जखमीचे नाव आहे. त्यांच्या डोक्यात गंभीर दुखापत झाल्याने त्यांना ‘सीपीआर’ रुग्णालयात दाखल केले. सोमवारी दुपारी हा प्रकार घडला.अधिक माहिती अशी, धनाजी साळुंखे हे रिक्षाचालक आहेत. सोमवारी दुपारी शहाजी वसाहत येथे ते आपल्या मित्रासोबत बसले होते. त्यावेळी युवराज पालकर त्याठिकाणी आला. त्याने धनाजी यांच्याकडे दारुसाठी पैसे मागितले. त्यांनी आपल्याकडे पैसे नाहीत, असे सांगताच त्याने लोखंडी रॉड डोक्यात मारला.
या हल्ल्यामध्ये धनाजी गंभीर जखमी झाले. सोबतच्या मित्रांनी त्यांना ‘सीपीआर’ रुग्णालयात दाखल केले. याप्रकरणी जुना राजवाडा पोलीस ठाण्यात नोंद झाली आहे. याबाबत रात्री उशिरापर्यंत जुना राजवाडा पोलीस ठाण्यात गुन्हा दाखल करण्याचे काम सुरू होते.