नेसरी : नेसरी ता. गडहींग्लज येथे आज आठवडा बाजारात वाहतूक शिस्त लावण्यासाठी गेलेल्या पोलीसाला ३ मच्छी व्यावसायिकांनी शिविगाळ व धक्काबुक्की केली. अशी फिर्याद स्वतः महेश दत्ताञय बांगर या पोलीसाने नेसरी पोलीसात दिली आहे.अधिक माहिती अशी, पोलीस बांगर हे नेसरी - गावठाण मार्गावर पेट्रोलींग करीत असता आठवडा बाजारात मसणाईदेवी मंदिर परिसरात मच्छी विकणारे व्यावसायिक असिफ मस्तान बोजगार, जरउद्दीन मस्तान बोजगार व रमेजा मस्तान बोजगार सर्व रा. गडहींग्लज या तिघांना आपली रोडवरील दुकाने मागे घ्या वाहतुकीस अडथळा होत आहे, असे सांगत असताना तुम्ही कोण सांगणारे म्हणत बांगर या पोलीसाला धक्काबुक्की व शिविगाळ केली. तसेच त्यांच्या खाकी वर्दीची कॉलर फाडून जीवे मारण्याची धमकी दिली.
दुपारी 12 च्या सुमारास हा प्रकार घडला. वरिल तिन्ही व्यावसायिकांच्या विरोधात नेसरी पोलीसात सरकारी कामात अडथळा व मारहाण संदर्भात गुन्हा नोंद झाला आहे.